National

’اب شاید پی ایم آپ سے پوچھیں گے- کیا کیجیے گا اتنی بڑی رقم کا؟‘ منریگا کی نئی شرح مزدوری پر راہل گاندھی کا طنز

132views

کانگریس کے سابق صدر راہل گاندھی نے منریگا کی شرح مزدوری میں ہوئے اضافہ کو لے کر مودی حکومت پر طنز کے تیر چلائے ہیں۔ راہل گاندھی نے منریگا مزدوروں کو مبارکباد پیش کرتے ہوئے کہا کہ پی ایم مودی اب آپ سے یہ سوال کر سکتے ہیں کہ آپ اتنی بڑی رقم کا کیا کریں گے؟

دراصل مرکزی حکومت کی طرف سے منریگا کی شرح مزدوری میں اضافہ کرنے کا اعلان کیا گیا ہے۔ لیکن یہ اضافہ ’اونٹ کے منھ میں زیرہ‘ کے برابر ہے۔ یہی وجہ ہے کہ راہل گاندھی نے اپنے سوشل میڈیا پوسٹ میں اس پر طنز کیا ہے۔ انھوں نے اپنے ’ایکس‘ اکاؤنٹ پر کیے گئے پوسٹ میں لکھا ہے ’’منریگا مزدوروں کو مبارکباد۔ وزیر اعظم نے آپ کا محنتانہ 7 روپے بڑھا دیا ہے۔ اب شاید وہ آپ سے پوچھیں ’کیا کیجیے گا آپ اتنی بڑی رقم کا؟‘ اور 700 کروڑ روپے خرچ کر آپ کے نام پر ’شکریہ مودی‘ کی مہم بھی شروع کر دیں۔‘‘

اپنے پوسٹ میں راہل گاندھی آگے لکھتے ہیں ’’جو مودی جی کی اس بے پناہ ہمدردی سے ناراض ہیں، وہ یاد رکھیں- انڈیا اتحاد کی حکومت پہلے دن ہر مزدور کا محنتانہ بڑھا کر 400 روپے روزانہ کرنے والی ہے۔‘‘

واضح رہے کہ مرکزی حکومت کی طرف سے منریگا کی شرح مزدوری میں اضافہ کیا گیا اور نئی شرحیں ریاست وار طے کی گئی ہیں۔ اس کے تحت سب سے زیادہ مزدوری گوا ریاست میں تقریباً 10.56 فیصد بڑھی ہے، جبکہ ملک کی سب سے زیادہ آبادی والے اتر پردیش 3.04 فیصد کا اضافہ درج کیا گیا ہے۔ اس طرح دیکھا جائے تو اتر پردیش میں مزدوری کا اضافہ محض 7 روپے ہوگا۔ پہلے یہ مزدوری روزانہ 230 روپے تھی جو اب بڑھ کر 237 روپے روزانہ ہو جائے گی۔

Follow us on Google News
Jadeed Bharat
www.jadeedbharat.com – The site publishes reliable news from around the world to the public, the website presents timely news on politics, views, commentary, campus, business, sports, entertainment, technology and world news.