سیاست میں کبھی فل اسٹاپ نہیں ہوتا

سیاسی افراد معاشرے میں ہمیشہ اپنا تعاون دیتے ہیں: مودی

راجیہ سبھا سے سبکدوش ارکان کیلئے رخصری تقر یب

نئی دہلی، 18 مارچ (یواین آئی) وزیر اعظم نریندر مودی نے کہا ہے کہ سیاست میں کبھی بھی فل اسٹاپ نہیں ہوتا اور اس میں شامل افراد ہمیشہ معاشرے اور ملک کی ترقی میں اپنا تعاون دیتے رہتے ہیں۔ مسٹر مودی نے یہ بات اگلے ماہ راجیہ سبھا سے سبکدوش ہونے والے 59 ارکان کو رخصت کرتے ہوئے کہی۔ایوان بالا میں ارکان کی مدت چھ سال ہے، اور ہر دو سال بعد، ایک تہائی ارکان ریٹائر ہو جاتے ہیں، ان کی جگہ نئے ارکان آتے ہیں، جس سے ایوان کو مسلسل فعال بنایا جاتا ہے۔ سبکدوش ہونے والے ارکان میں سینئرارکان جیسے ڈپٹی چیئرمین ہری ونش، قائد حزب اختلاف ملکارجن کھرگے، سابق وزیراعظم ایچ ڈی۔ دیوے گوڑا، شرد پوار، رام داس اٹھاولے، اور تروچی سیوا شامل ہیں۔
مسٹر مودی نے کہا کہ سیاست میں کبھی بھی فل اسٹاپ نہیں ہوتا ہے، اور ملک اور سماج کو ہمیشہ لیڈروں کی طرف سے فعال تعاون ملتا رہے گا۔ مسٹر کھرگے، مسٹر گوڑا اور مسٹر پوار کا حوالہ دیتے ہوئے، انہوں نے کہا کہ ان ارکان نے اپنی پارلیمانی زندگی کی نصف سے زیادہ مدت اپنی پارلیمانی ذمہ داریوں کو نبھاتے ہوئے گزاری ہے اور یہ سب کے لیے تحریک کا باعث ہیں۔ انہوں نے کہا کہ وہ ان سے سیکھ سکتے ہیں کہ انہیں جو بھی ذمہ داری سونپی گئی ہے اس کے لیے کس طرح وقف رہنا ہے۔
ملیکارجن کھرگے نے اپنی تقریر میں جب کہا کہ نریندرمودی آج کل اپنی تقاریر میں شاعری نہیں کرتے، تو اس پر جواب دیتے ہوئے وزیر اعظم نے کہا کہ وہ کھرگے جی کی خواہش کے مطابق ایک شعر کے ذریعے اپنی بات پیش کرتے ہیں۔ انہوں نے کہا:”ایسا کام کرو کہ جہاں سے تمہاری نظر گزرے، وہاں سے تمہیں سلام آئے۔”ڈپٹی چیئرمین ہری ونش نارائن سنگھ کے بارے میں انہوں نے کہا کہ انہوں نے طویل عرصے تک اپنی ذمہ داریاں بخوبی نبھائیں اور سب کا اعتماد جیتنے کی کوشش کی۔ وزیر اعظم نے کہا کہ ان کا تجربہ بہت وسیع ہے اور جب ایوان نہیں چلتا تو وہ نوجوانوں کے ساتھ بات چیت کرتے رہتے ہیں اور ملک کے تئیں بیداری پیدا کرنے کا کام کرتے رہتے ہیں۔مسٹر مودی نے کہا کہ مسٹر اٹھاولے ہمیشہ خوش مزاج رہنے والے رہنما ہیں اور آئندہ بھی لوگوں کی زندگی میں خوشی اور مزاح شامل کرتے رہیں گے۔ انہوں نے امید ظاہر کی کہ نئے اراکینِ پارلیمنٹ کو سینئر اراکین کے تجربے سے فائدہ ملتا رہے گا۔پارلیمنٹ کے دونوں ایوانوں کو ایک دوسرے کی تکمیلی قرار دیتے ہوئے انہوں نے کہا کہ عوامی زندگی میں اہم فیصلے کرتے وقت دوسرا نقطۂ نظر جاننا ضروری ہوتا ہے اور اس کی بڑی اہمیت ہوتی ہے۔ اسی طرح دونوں ایوانوں میں بحث و مباحثہ سے خیالات کو نیا رخ ملتا ہے اور فیصلہ سازی کا عمل مضبوط ہوتا ہے۔ انہوں نے کہا کہ یہی ہمارے جمہوری نظام کی اصل طاقت ہے۔مسٹر کھرگے نے اپنے خطاب کا آغاز ایک شعر سے کرتے ہوئے کہا، “مجھے نہیں معلوم کہاں سے شروع کروں۔ آپ کے جانے کا ذکر میرے دل کو دکھ سے بھر دیتا ہے۔” انہوں نے کہا کہ عوامی زندگی میں لوگ کبھی ریٹائر نہیں ہوتے۔ “میں 50 سال سے زیادہ عوامی زندگی میں ہوں، اور راجیہ سبھا میں میرا تجربہ تلخ اور میٹھا رہا ہے۔” انہوں نے کہا کہ اس ایوان کو بامقصد بنانے اور اسے معاشرے میں مزید حصہ ڈالنے کے قابل بنانے کے لیے مزید کام کرنے کی ضرورت ہے۔مسٹر دیوے گوڑا کا تذکرہ کرتے ہوئے اپوزیشن لیڈر نے ہلکے پھلکے لہجے میں کہا، ” انہوں نے محبت ہمارے ساتھ کی لیکن مودی جی سے شادی کی۔” انہوں نے مزید کہا کہ مسٹر شرد پوار وسیع تجربہ رکھنے والے قومی رہنما رہے ہیں۔ انہوں نے کہا کہ مسٹر اٹھاولے اپنی شاعری میں مودی جی کی تعریف کرتے ہیں۔ وہ کوئی اور شاعری نہیں جانتے۔ انہوں نے واضح کیا کہ دگ وجے سنگھ نے ایک دہائی تک مدھیہ پردیش کے وزیر اعلی کے طور پر خدمات انجام دیں اور راجیہ سبھا میں بھی اچھا کام کیا۔مسٹر کھرگے نے کہا کہ کانگریس کے ارکان شکتی سنگھ گوہل اور نیرج ڈانگی نے اپنی صلاحیتوں سے بہترین تعاون کیا ہے اور رجنی پاٹل سماج اور بچوں کی فلاح و بہبود کے لیے کام کر رہی ہیں۔ انہوں نے مزید کہا کہ ساکیت گوکھلے نے بھی تعاون کیا ہے۔
ملیکارجن کھرگے نے نائب چیئرمین ہری ونش نارائن سنگھ کے بارے میں کہا کہ وہ نہایت شائستہ اور مہذب رہنما ہیں اور انہوں نے ہمیشہ اپنی ذمہ داریاں بخوبی نبھائی ہیں۔انہوں نے ایوان میں حکومت اور اپوزیشن کے کردار کا ذکر کرتے ہوئے کہا کہ اچھی قانون سازی کے عمل میں دونوں فریقوں کا تعاون ضروری ہوتا ہے۔ تمام بلوں پر برابر بحث ہونی چاہیے اور اراکین کو یکساں مواقع ملنے چاہئیں۔ انہوں نے یہ بھی کہا کہ پارلیمنٹ کے اجلاس کے دنوں میں اضافہ کیا جانا چاہیے۔ کارروائی سے بعض الفاظ حذف کیے جانے پر سوال اٹھاتے ہوئے انہوں نے کہا کہ کئی بار اس معاملے میں حد سے زیادہ سختی برتی جاتی ہے۔آخر میں ہری ونش نارائن سنگھ نے سبکدوش ہونے والے اراکین کو نیک تمناؤں کے ساتھ رخصت کیا اور امید ظاہر کی کہ وہ آئندہ بھی اسی طرح ملک کی خدمت کرتے رہیں گے۔