جلوسِ محمدی ؐ انسانیت کیلئے محبت، اخوت اور ایمان کا پیغام ہے: سید بابر اشرف

لکھنؤ ،6؍ستمبر(راست)آل انڈیا محمدی مشن کے زیرِ اہتمام جلوسِ محمدی ؐاس سال بھی صدرِ اعلیٰ سید ایوب اشرف کی قیادت اور سید یعقوب اشرف کی سرپرستی میں نہایت کامیابی اور عظمت کے ساتھ نکالا گیا۔ الحمدللّٰہ، گزشتہ برسوں کی طرح اس سال کا یہ مقدس جلوس دراصل عید میلادالنبی ؐ کے پرمسرت موقع پر پوری انسانیت کو امن، محبت اور بھائی چارے کا پیغام دیتا ہے۔
انتظامیہ کا شکریہ
اس جلوس کو پرامن اور کامیاب بنانے میں ضلع انتظامیہ نے نہایت اہم کردار ادا کیا۔ اس موقع پر آل انڈیا محمدی مشن کے سکریٹری جنرل سید بابر اشرف کچوچھوی نے اپنی پوری ٹیم کی جانب سے انتظامیہ کا خصوصی شکریہ ادا کیا۔انہوں نے کہاکہ “یہ جلوس واحد ایسا جلوس ہے جس میں تمام مذاہب و طبقات کے لوگ نہ صرف شرکاء کا استقبال کرتے ہیں بلکہ سبیلوں کا بھی اہتمام کرتے ہیں۔ یہ منظر لکھنؤ کی گنگا-جمنی تہذیب اور آپسی بھائی چارے کی روشن مثال ہے۔”
گمراہ کن افکار پر تنبیہ
سید بابر اشرف نے اس بات پر افسوس ظاہر کیا کہ طویل عرصے سے کچھ حلقے نوجوانوں کو گمراہ کرنے کی کوشش کر رہے ہیں۔ وہ یا تو لاعلمی کی بنیاد پر یا شدت پسندانہ نظریات کے زیرِ اثر آکر اس مقدس جلوس کے خلاف بے بنیاد پروپیگنڈہ کرتے ہیں۔ انہوں نے کہاکہ “یہ جلوسِ محمدی ؐہر کلمہ گو کے لیے باعثِ مسرت ہے اور جس نبی کریم ؐ کی آمد کے صدقے ہم سب ایمان کی روشنی سے سرفراز ہوئے، انہیں ہی لوگوں کے سامنے مشکوک بنا دینا انتہائی افسوسناک اور شرمناک عمل ہے۔ جو دن مؤمنین کے لیے سب سے عزیز اور مقدس ہے، اس دن کو بدعت یا غیر شرعی قرار دینا دراصل حضور ؐکی محبت کو کمزور کرنے کی ناپاک کوشش ہے۔”
اہلِ بیت و صحابہ کی عظمت
انہوں نے مزید کہا کہ حضور اکرم ؐکی تعلیمات کے مطابق اہلِ بیتِ اطہار اور صحابہ کرام کی محبت ایمان کا حصہ ہے۔ “حضرت علی کرم اللہ وجہہ کی محبت عین ایمان ہے۔ اسی طرح امام حسن و حسین علیہما السلام اور سیدہ فاطمہ الزہراء سلام اللہ علیہا کی سیرت و قربانیوں کو یاد کرنا اور ان کی تاریخوں پر محافل منعقد کرنا امت کو حقیقی اسلام اور محبتِ رسول ؐسے جوڑتا ہے۔” بابر اشرف نے کہا کہ جب ان ہستیوں کا ذکر امت کے ایمان کو تازگی بخشتا ہے تو پھر خود حضور اکرم ؐکی ولادتِ باسعادت کا دن، جس کی آمد کی خوشی سے دل جھوم اٹھتے ہیں، اس سے دور کرنے کی سازش کسی بھی صورت حکمت نہیں بلکہ ایک منظم گمراہ کن ایجنڈہ ہے۔
قرآن و حدیث کی روشنی میں میلاد کی فضیلت
انہوں نے قرآن و حدیث کی روشنی میں عید میلادالنبی ؐکی فضیلت اور رسول اکرم ؐکے اختیارات و موجبات کو بھی بیان کیا تاکہ لوگ سمجھ سکیں کہ:
“کی محمد سے وفا تو ہم ترے ہیں
یہ جہاں چیز ہے کیا، لوح و قلم ترے ہیں”
⸻ جلوسِ محمدی ؐاس بات کا اعلان ہے کہ رسول اکرم ؐکی محبت ہی ایمان کی بنیاد ہے۔ یہ جلوس نفرت اور تنگ نظری کے خلاف، امن، محبت اور بھائی چارے کا پیغام لے کر نکلتا ہے اور آنے والی نسلوں کو یہ پیغام دیتا ہے کہ نبی کریم ؐکی ولادت صرف ایک دن کی خوشی نہیں بلکہ پوری انسانیت کے لیے ہدایت اور رحمت ہے۔