اتر پردیش کے ہردوئی ضلع میں آتشزدگی واقعہ نے ایک دو نہیں، بلکہ کم و بیش 40 گھروں کو جلا کر خاک کر دیا۔ واقعہ جمعرات کی دیر شب کا ہے جب ایک معمولی سی چنگاری نے دیکھتے ہی دیکھتے خوفناک آگ کی شکل اختیار کر لی۔ اس کی زد میں نصف گاؤں آ گیا اور اب صورت حال یہ ہے کہ لوگوں کو غذا کی قلت کا سامنا کرنا پڑ رہا ہے۔ وجہ یہ ہے کہ اس علاقہ میں موجود سبھی غذا آگ کی نذر ہو گیا ہے۔
میڈیا رپورٹس کے مطابق آگ کی خبر ملنے کے بعد ریونیو محکمہ سمیت دیگر افسران نے جائے وقوع پر پہنچ کر پیشگی آئینی کارروائی شروع کی۔ اس آتشزدگی واقعہ میں اپنا سب کچھ گنوا چکے لوگ غمزدہ ہیں اور مستقبل کو لے کر فکرمند بھی۔
بتایا جاتا ہے کہ تڑیاواں تھانہ حلقہ کے پھکہا گاؤں میں دیر شب زبردست آندھی کے دوران ایک کی آگ بھڑک گئی۔ اس سے اٹھی چنگاری نے گھر میں آگ لگا دی، اور پھر دیکھتے ہی دیکھتے نصف گاؤں جل کر راکھ ہو گیا۔ مقامی لوگوں کا کہنا ہے کہ 40 گھر اس آگ کی نذر ہو گئے اور تقریباً 24 مویشیوں کی بھی جل کر موت ہو گئی۔
ایک میڈیا رپورٹ میں بتایا گیا ہے کہ حادثہ کی خبر فائر بریگیڈ کو فوری طور پر دی گئی، لیکن راستہ میں درخت گر جانے کے سبب فائر بریگیڈ کی گاڑیاں جائے وقوع تک نہیں پہنچ سکیں۔ مقامی لوگوں نے پمپ سیٹ کی مدد سے پانی چلا کر آگ کو بجھانے میں کامیابی حاصل کی۔ اس حادثہ کے کافی دیر بعد ریونیو محکمہ کے ملازمین پہنچے۔ نتیجہ یہ ہوا کہ انھیں مقامی لوگوں کی سخت ناراضگی کا سامنا کرنا پڑا۔ لوگوں کا کہنا ہے کہ اگر وقت پر کارروائی کی گئی ہوتی تو اتنا نقصان نہیں اٹھانا پڑتا۔
