’’اسٹارٹ اپ انڈیا ‘‘نے ملک کو سب سے زیادہ متحرک اسٹارٹ اپ ماحولیاتی نظام میں سے ایک بننے کی تحریک دی: مودی

نئی دلی۔ 16؍جنوری۔ ایم این این۔ایک تبدیلی کے پروگرام کے طور پر ‘ اسٹارٹ اپ انڈیا کی تعریف کرتے ہوئے، وزیر اعظم نریندر مودی نے جمعرات کو اس کی نویں سالگرہ کے موقع پر کہا کہ اس پہل نے ہندوستان کو عالمی سطح پر سب سے بڑے اور سب سے زیادہ متحرک سٹارٹ اپ ماحولیاتی نظام میں سے ایک بننے کی تحریک دی ہے۔ انہوں نے پروگرام کو “میرے دل کے بہت قریب” قرار دیتے ہوئے کہا کہ یہ ایک تاریخی اقدام ہے جس نے جدت طرازی، کاروبار اور ترقی کی نئی تعریف کی ہے، کیونکہ یہ نوجوانوں کو بااختیار بنانے کے ایک طاقتور طریقے کے طور پر ابھرا ہے۔انہوں نے ایکس پر کہا، “گزشتہ نو سالوں میں، اس تبدیلی کے پروگرام نے لاتعداد نوجوانوں کو بااختیار بنایا ہے، اور ان کے اختراعی خیالات کو کامیاب اسٹارٹ اپس میں تبدیل کیا ہے۔”انہوں نے مزید کہا کہ لوگ صرف ایک دہائی قبل اس نظام میں پنپنے کی ہندوستان کی صلاحیت پر شک کرتے تھے۔وزیر اعظم نے کہا کہ اس “تبدیلی” پروگرام نے لاتعداد نوجوانوں کو بااختیار بنایا ہے اور ان کے اختراعی آئیڈیاز کو کامیاب اسٹارٹ اپس میں تبدیل کیا ہے۔ٹیک سے چلنے والے حل سے لے کر دیہی اختراعات تک، صحت کی دیکھ بھال میں پیشرفت سے لے کر بائیو ٹیک کامیابیوں تک، فن ٹیک سے ایڈ ٹیک تک، صاف توانائی سے لے کر پائیدار ٹیکنالوجی تک، ہندوستانی اسٹارٹ اپس عالمی چیلنجوں کو حل کر رہے ہیں۔