مہمانوں کے داخلے کے لیے جانچ کے نئے ضابطے
ممبئی ، 23 مئی (یو این آئی) :ممبئی پولیس نے بالی ووڈ اداکار سلمان خان کی باندرہ میں واقع رہائش گاہ گلیکسی اپارٹمنٹس پر مہمانوں کے داخلے اور باہر نکلنے کے نظام کو مزید منظم کرنے کا فیصلہ کیا ہے۔ حکام کے مطابق، یہ اقدام اس وقت سامنے آیا ہے جب حالیہ دنوں میں لارنس بشنوئی گینگ کی جانب سے اداکار کو دھمکیاں ملنے کے بعد ان کی سیکورٹی میں اضافہ کیا گیا اور انہیں وائی پلس سیکورٹی فراہم کی گئی ہے۔اس ہفتے کے آغاز میں پولیس نے ایک مرد اور ایک عورت کو خان کی عمارت میں الگ الگ گھسنے کے الزام میں گرفتار کیا تھا۔ اہلکاروں کا کہنا ہے کہ سلمان خان کو ملنے والی مسلسل دھمکیوں اور عمارت میں دراندازی کے واقعات کے پیش نظر پولیس مہمانوں کے داخلے کو ریگولیٹ کرنے اور حفاظتی انتظامات کو مزید مضبوط بنانے پر غور کر رہی ہے۔چونکہ گلیکسی اپارٹمنٹس ایک نجی رہائشی عمارت ہے، اس لیے ہر آنے والے کی مکمل جانچ کرنا پولیس کے لیے چیلنج ہو سکتا ہے۔ ذرائع کے مطابق، اب نئے آنے والوں کو عمارت میں داخلے کے لیے مکینوں سے اپنی شناخت کی تصدیق کرانا لازمی ہوگا۔ پولیس کے مطابق، جمعرات کو ایک جیتیندر سنگھ اور ایشا چھابریا کو الگ الگ واقعات میں گھر میں غیر قانونی طور پر داخل ہونے کے الزام میں گرفتار کیا گیا ہے۔ یاد رہے کہ گزشتہ سال اپریل میں بشنوئی گینگ کے ارکان نے گلیکسی اپارٹمنٹس کے باہر کئی راؤنڈ فائر کیے تھے۔
