ہر مذہبی مقام کے اصولوں اور روایات کا احترام ضروری : مولانا قلبِ جواد

لکھنؤ، 15 مارچ (یو این آئی) لکھنؤ کے تاریخی بڑا امام باڑہ میں ایک ڈیجیٹل تخلیق کار کے گھومنے کے معاملے پر اعتراض سے متعلق سوشل میڈیا پر وائرل ویڈیو نے تنازعہ پیدا کر دیا ہے۔ اس معاملے میں حجاب سے متعلق اٹھے اختلاف پر شیعہ مذہبی رہنما مولانا قلب جواد نے ردعمل ظاہر کرتے ہوئے کہا کہ ہر مذہبی مقام کے اپنے اصول اور روایات ہوتی ہیں اور ان کا احترام کرنا ضروری ہے۔اتوار کو مولانا قلب جواد نے کہا کہ اگر کوئی شخص امام باڑہ دیکھنے آتا ہے تو اسے وہاں کی روایات اور آداب کا خیال رکھنا چاہیے۔ ان کا کہنا تھا کہ کئی مندروں میں مسلمانوں کے داخلے پر پابندی ہوتی ہے، جبکہ امام باڑے میں سب کو آنے کی اجازت ہے، لیکن وہاں کی مذہبی حدود اور ضابطوں کی پابندی لازمی ہے۔ ان کے مطابق امام باڑہ ایک مذہبی مقام ہے، اس لیے انتظامیہ کو یہ حق حاصل ہے کہ وہ بغیر سر ڈھانپے اندر آنے سے روک سکے۔درحقیقت حال ہی میں ایک ڈیجیٹل کریئیٹر مانیا سنگھ کی ایک ویڈیو سوشل میڈیا پر وائرل ہوئی ہے، جس میں انہوں نے دعویٰ کیا کہ بڑا امام باڑہ کے احاطے میں ان سے حجاب پہننے کو کہا گیا اور ان کی شرٹ کے بٹن بند کرنے کا بھی مشورہ دیا گیا۔ کریئیٹر کے مطابق جب انہوں نے اس بات پر اعتراض کیا تو وہاں کا ماحول کشیدہ ہو گیا اور کچھ لوگوں نے انہیں باہر جانے تک کے لیے کہہ دیا۔مانیا سنگھ نے اپنے سوشل میڈیا پوسٹ میں بتایا کہ وہ اپنے دوستوں کے ساتھ لکھنؤ گھومنے آئی تھیں اور ٹکٹ لے کر بڑا امام باڑہ دیکھنے گئیں۔ ان کا کہنا ہے کہ داخلے کے وقت کسی قسم کے ڈریس کوڈ کے بارے میں نہیں بتایا گیا، لیکن اندر پہنچنے کے بعد ان سے سر ڈھانکنے کے لیے کہا گیا۔کریئیٹر کے مطابق جب انہوں نے حجاب پہننے سے انکار کیا تو وہاں موجود کچھ لوگوں نے انہیں دوپٹہ لا کر سر ڈھانکنے کا مشورہ دیا۔ انہوں نے یہ بھی الزام لگایا کہ ایک شخص نے ان سے شرٹ کا بٹن بند کرنے کو کہا، جس پر انہوں نے اعتراض کیا اور اسے اپنی ذاتی آزادی سے متعلق معاملہ قرار دیا۔ویڈیو میں مانیا سنگھ نے یہ بھی دعویٰ کیا کہ امام باڑہ کے باہر امریکہ اور اسرائیل مخالف پوسٹر لگے ہوئے تھے اور کچھ لوگوں نے انہیں ان پوسٹروں پر پاؤں رکھ کر اندر جانے کے لیے کہا، لیکن انہوں نے ایسا کرنے سے انکار کر دیا۔