ملیکارجن کھرگے اور راہل گاندھی نے وجے دیوس کے موقع پر مسلح افواج کو خراج عقیدت پیش کیا

نئی دہلی، 16 دسمبر (یو این آئی)کانگریس کے صدر ملّیکارجن کھرگے اور لوک سبھا میں حزب اختلاف کے رہنما راہل گاندھی نے 1971 کی جنگ میں ہندوستان کی تاریخی فتح کو یقینی بنانے والے فوجیوں کی بہادری، قربانی اور دلیری کو یاد کرتے ہوئے مسلح افواج کو ’وِجے دیوس‘ کے موقع پر خراجِ عقیدت پیش کیا۔مسٹر کھرگے نے قوم کی مسلح افواج اور مکتی واہنی کی غیر معمولی بہادری اور قربانی کو یاد کرتے ہوئے انہیں خراجِ عقیدت پیش کیا۔ مسٹر کھرگے نے ایکس پر لکھا کہ ’1971 میں اسی دن تاریخ رقم ہوئی تھی، جب ہندوستان کی بہادر مسلح افواج نے پاکستان کو فیصلہ کن شکست دی، جس سے بنگلہ دیش کو آزادی ملی اور دنیا کے نقشے کو ایک نئی شکل ملی‘۔مسٹر کھرگے نے اس وقت کی وزیر اعظم اندرا گاندھی کی فیصلہ کن قیادت کو یاد کرتے ہوئے کہا کہ ’آنجہانی اندرا گاندھی کی دور اندیش، بہادر اور پختہ قیادت میں، یہ فتح انسانیت اور انصاف کی ایک عظیم مثال بنی‘۔کانگریس کے صدر نے فوجیوں کو خراجِ عقیدت پیش کرتے ہوئے کہا کہ ’ہم ہندوستان کی عسکری طاقت اور مکتی واہنی کی غیر معمولی شجاعت، دلیری اور قربانی کو سلام پیش کرتے ہیں اور ان بہادر سپوتوں کی لگن اور بے لوث خدمت کو ملک ہمیشہ یاد رکھے گا‘۔مسٹر گاندھی نے جنوبی ایشیا کو نیا نقشہ دینے اور بنگلہ دیش کی تشکیل والے اس دن کو یاد کرتے ہوئے مسلح افواج کی بہادری کی تعریف کی اور اس وقت کی وزیر اعظم اندرا گاندھی کی فیصلہ کن قیادت کو بھی یاد کیا۔ انہوں نے کہا کہ ’ان کی بے پناہ بہادری، جدوجہد اور اعلیٰ ترین قربانی ہمیشہ ہر ہندوستانی کے لیے ایک تحریک کا باعث رہے گی‘۔کانگریس لیڈر نے آنجہانی وزیر اعظم اندرا گاندھی کی 1971 میں تینوں فوجی سربراہوں کے ساتھ ہاتھ ملاتے ہوئے تصاویر اور ڈھاکہ میں ہتھیار ڈالنے کی تقریب کی تصویر کو سوشل میڈیا پلیٹ فارم پر پوسٹ کیا اور کہا کہ ’اس وِجے دیوس پر میں مسلح افواج کے ان بہادر ہیروز کو سلام پیش کرتا ہوں، جنہوں نے 1971 کی جنگ میں ہندوستان کی سرحدوں کا دفاع کرتے ہوئے اپنی بہادری، لگن اور ناقابلِ شکست عزم سے دنیا میں تاریخ رقم کی‘۔ سینئر فوجی افسران نے بھی شہید ہونے والے فوجیوں کو خراجِ عقیدت پیش کیا اور قوم کی خودمختاری کی حفاظت کے لیے فوج کی وابستگی کو دہرایا۔فوجی تنصیبات پر چادر چڑھانے کی تقریبات اور یادگاری پریڈ سمیت رسمی تقریبات کا انعقاد کیا گیا۔ فوجی اداروں میں گل پوشی کی تقریب اور یادگار پریڈ سمیت رسمی پروگرام منعقد کیے گئے۔