مرادآباد بار ایسوسی ایشن نے کیا شدید احتجاج
مراداباد، 23 فروری:۔ (ایجنسی)اترپردیش کے سنبھل میں چیف جوڈیشیل مجسٹریٹ (سی جے ایم) کے تبادلے کو لے کر وکلاء میں شدید غصہ دیکھنے کو مل رہا ہے۔ اسی سلسلے میں ’مراد آباد دی بار ایسوسی ایشن اینڈ لائبریری‘ کے جنرل ہاؤس میں جمعرات (22 جنوری) کی دوپہر سنبھل کے سی جے ایم وِبھانشو سدھیر کے تبادلے کی وکلاء نے سخت مخالفت کی۔ ان لوگوں نے کہا کہ اس واقعہ سے عدلیہ کی آزادی اور غیر جانبداری کو گہرا زخم پہنچا ہے۔ چیف جوڈیشل مجسٹریٹ کے عدالتی حکم کی خلاف ورزی والے بیان دینے والے افسران کے خلاف ہائی کورٹ سے از خود توہین عدالت کی کارروائی کی توقع ظاہر کی۔ جنرل ہاؤس کے اجلاس کی صدارت بار کے صدر آنند موہن گپتا نے کی۔ اجلاس میں وکلاء نے کہا کہ پولیس کے خلاف ایف آئی آر درج کرنے کا عدالتی حکم جاری کرنے کے بعد سی جے ایم کا تبادلہ انتہائی افسوسناک ہے۔ یہ واقعہ نہ صرف عدلیہ کی آزادی بلکہ عدلیہ کی غیر جانبداری، وقار اور ادارہ جاتی عزت نفس کے لحاظ سے بھی انتہائی تشویشناک ہے۔ بار ایسوسی ایشن اینڈ لائبریری کا واضح موقف ہے کہ اگر کسی عدالتی افسر کے ذریعہ اپنی عدالتی بصیرت سے جاری کردہ قانونی احکامات کے بعد اس قسم کے انتظامی فیصلے لیے جاتے ہیں تو اس سے عدلیہ کی سالمیت مجروح ہوتی ہے۔ ساتھ ہی عام شہریوں کے ذہنوں میں یہ تاثر پیدا کیا جاتا ہے کہ عدالتی آزادی پر دباؤ ڈالا جا رہا ہے۔ جنرل ہاؤس میں موجود تمام لوگوں نے کہا کہ ہائی کورٹ الٰہ آباد کے چیف جسٹس کو اس تجویز سے آگاہ کرایا جائے گا۔ اس سلسلے میں ڈسٹرکٹ جج مرادآباد کے ذریعہ انہیں ایک میمورنڈم بھیجا جائے گا۔ اجلاس میں یہ بھی فیصلہ لیا گیا کہ اگر اس تعلق سے کوئی تسلی بخش فیصلہ نہیں لیا جاتا ہے تو آئندہ کے لائحہ عمل کے لیے دوبارہ غور کیا جائے گا۔ قابل ذکر ہے کہ 2 روز قبل ہائی کورٹ نے سنبھل کے سی جے ایم وِبھانشو سدھیر سمیت 14 ججوں کا تبادلہ کر دیا تھا۔ وِبھانشو سدھیر کو سلطان پور بھیج دیا گیا ہے۔
