متاثرہ لڑکی کے ساتھ شادی کے بعد دو بچوں کا باپ بن گیا
تھانے، 13 جولائی:۔ (ایجنسی) مہاراشٹر کے تھانے کی ایک عدالت نے نابالغ لڑکی کے اغوا اور جنسی زیادتی کے ملزم کو بری کر دیا۔ عدالت نے کہا کہ متاثرہ نے بیان دیا کہ ان کے بیچ جو کچھ ہوا وہ آپسی رضامندی سے ہوا۔ لڑکی کے والد نے یہ بھی کہا کہ انہیں ملزم کے خلاف کوئی شکایت نہیں ہے۔ خصوصی پاسکو (POCSO) عدالت کے جج ڈی ایس دیش مکھ نے 9 جولائی کو جاری ایک حکم میں کہا کہ واردات کے بعد ملزم نے متاثرہ سے شادی کر لی تھی اور اب ان کے دو بچے بھی ہیں۔معاملہ کیا ہے؟
جھارکھنڈ کے ایک 25 سالہ شخص پر دو جنوری 2020 کو مہاراشٹر کے تھانے ضلع کے بھیندر علاقے کی رہائشی ایک لڑکی کو اغوا کرنے اور جنسی زیادتی کا نشانہ بنانے کا الزام عائد کیا گیا۔ لڑکی کے باپ نے چار جنوری 2020 کو بھیندر پولیس اسٹیشن میں بیٹی کی گمشدگی کی شکایت درج کروائی تھی۔ جس میں کہا گیا تھا کہ اس کی 15 سالہ بیٹی گھر سے واپس نہیں آئی تھی۔ اس کے بعد ملزم کے خلاف تعزیرات ہند کی متعلقہ دفعات اور جنسی جرائم سے بچوں کے تحفظ (POCSO) ایکٹ کے تحت عصمت دری اور اغوا کا مقدمہ درج کیا گیا۔ مقدمے کی سماعت کے دوران متاثرہ لڑکی اور اس کے باپ نے ابتدائی پولیس رپورٹ کی تردید کی۔
عدالت میں کیا بیان دیا گیا؟
عدالت نے 15 جون 2004 کو لڑکی کی تاریخ پیدائش اور ممبئی کے سرکاری جے جے ہسپتال کی عمر کی تشخیص رپورٹ کی بنیاد پر پاسکو ایکٹ کے تحت متاثرہ لڑکی کو “نابالغ” قرار دیا جس میں اس کی عمر 16 سے 17 سال کے درمیان بتائی گئی۔ جج نے کہا کہ استغاثہ کے گواہ (لڑکی کے والد) نے اعتراف کیا کہ متاثرہ لڑکی اپنی مرضی سے ملزم کے ساتھ بھاگ گئی تھی۔ انہوں نے بتایا کہ ان کے درمیان محبت کا رشتہ تھا۔ ملزم نے زبردستی جنسی تعلق قائم نہیں کیا۔ عدالت نے کہا، “اس نے (گواہ) نے یہ بھی اعتراف کیا کہ ملزم اور متاثرہ نے شادی کر لی ہے، وہ میاں بیوی ہیں، ان کے دو بچے بھی ہیں اور وہ خوشی سے رہ رہے ہیں۔ انہیں ملزم کے خلاف کوئی شکایت نہیں ہے،” عدالت نے کہا متاثرہ نے بھی تصدیق کی کہ یہ رشتہ رضامندی سے ہوا تھا۔ اس کی گواہی سے پتہ چلتا ہے کہ اس کے اور ملزم کے درمیان محبت کا رشتہ تھا۔ عدالت نے کہا کہ وہ موبائل فون پر بات کرتے تھے اور جب اس کی والدہ کو اس کے بارے میں معلوم ہوا تو انہوں نے اسے اسکول جانے سے روک دیا۔
محبت کا معاملہ
لڑکی کے مطابق وہ ملزم سے شادی کرنا چاہتی تھی۔ چنانچہ دو جنوری 2020 کو وہ باتھ روم جانے کے بہانے گھر سے نکلی اور ملزم سے جا ملی۔ وہ دونوں پٹنہ چلے گئے۔ لڑکی کے بیان کے مطابق ’وہاں انہوں نے شادی کی اور اپنی رضامندی سے جسمانی تعلق بنائے‘۔ عدالت نے کہا کہ متاثرہ نے جرح کے دوران اعتراف کیا کہ “ملزم اس کا شوہر ہے، اس کے دو بچے ہیں اور اسے ملزم کے خلاف کوئی شکایت نہیں ہے۔” عدالت نے کہا ” تمام شواہد، سی آر پی سی کی دفعہ 164 کے تحت بیان اور اس حقیقت کو دیکھتے ہوئے کہ واقعے کے وقت متاثرہ کی عمر 17 سال تھی۔ اس کا مطلب ہے کہ وہ اپنے فعل کی نوعیت اور اس کے نتائج کو سمجھنے کی عمر کو پہنچ گئی ہے، ایسے میں ملزم کو قصوروار نہیں ٹھہرایا جا سکتا۔” عدالت نے کہا کہ ‘دونوں اہم گواہوں نے استغاثہ کی کہانی کی بالکل حمایت نہیں کی، متاثرہ لڑکی نے ملزم سے شادی کی ہے، ان کے دو بچے ہیں اور اسے ملزم سے کوئی شکایت نہیں ہے، ایسے حالات میں ملزم کا جرم ثابت کرنے کے لیے ریکارڈ پر کچھ نہیں ہے ‘۔ اس نے مزید کہا کہ پاسکو ایکٹ کے التزامات کو اپنی طرف متوجہ کرنے والے بنیادی حقائق ثابت نہیں ہوئے، لہٰذا ملزم کو بری کیا جاتا ہے۔
