اشیائے خوردونوش اور ذاتی استعمال کی چیزیں سستی
اورنگ آباد ، 4 ستمبر (یو این آئی) ہندوستان میں جی ایس ٹی 2.0 اصلاحات 22 ستمبر 2025 سے نافذ العمل ہوں گی جن کے تحت گھریلو استعمال کی بیشتر روزمرہ اشیاء پر ٹیکس میں نمایاں کمی کی گئی ہے۔ 3 ستمبر کو جی ایس ٹی کونسل کی 56 ویں میٹنگ میں نئے دو سلیب ڈھانچے کو منظوری دی گئی ہے جو پہلے سے موجود چار درجے کے پیچیدہ نظام کی جگہ لے گا، اس فیصلے سے گھریلو صارفین کو براہ راست راحت ملے گی ۔سب سے زیادہ کمی ذاتی اشیائے صرف سے وابستہ مصنوعات میں کی گئی ہے جن پر جی ایس ٹی کو 18 فیصد سے گھٹا کر 5 فیصد کردیا گیا ہے۔ ان اشیاء میں بالوں کا تیل، شیمپو، ٹوتھ پیسٹ، صابن، ٹوتھ برش اور شیونگ کریم شامل ہیں۔ اسی طرح ٹیلکم پاؤڈر، ٹوتھ پاؤڈر اور فیس پاؤڈر بھی اب کم شرح پر دستیاب ہوں گے۔ کچن کے سامان جیسے دسترخوان، برتن اور بوتلوں پر بھی ٹیکس کو 12 تا 18 فیصد سے کم کرکے صرف 5 فیصد کر دیا گیا ہے جس سے گھریلو بجٹ پر مثبت اثر پڑے گا۔اشیأے خوردونوش میں بھی بڑی رعایت دی گئی ہے۔ دودھ، پنیر، روٹی، چپاتی، کھکھرا اور پیزا بریڈ کو مکمل طور پر ٹیکس سے مستثنیٰ کر دیا گیا ہے۔ اسی طرح مکھن، گھی، ڈیری اسپریڈ، نمکین، بھجیا، چٹنی، پاستا، نوڈلز، چاکلیٹ، کافی، بسکٹ، آئس کریم، جوس، خشک میوہ جات اور کھجور پر صرف 5 فیصد ٹیکس عائد ہوگا۔ گھریلو اشیاء جیسے سائیکل، چھتری، نیپکن اور بانس کا فرنیچر بھی 12 فیصد سے کم ہوکر 5 فیصد سلیب میں آ گئے ہیں۔ سلائی مشینیں اور ان کے پرزے بھی اس میں شامل ہیں۔بڑے گھریلو آلات پر سب سے زیادہ رعایت کی گئی ہے، ایئر کنڈیشنر، 32 انچ سے بڑے ٹی وی، فریج، واشنگ مشین اور ڈش واشر پر ٹیکس کو 28 فیصد سے گھٹا کر 18 فیصد کر دیا گیا ہے۔ ماہرین کے مطابق ان آلات کی قیمت میں اوسطاً 6 تا 7 فیصد کمی آئے گی۔یہ اقدامات تہوار کے موسم سے قبل کیے گئے ہیں تاکہ صارفین زیادہ خریداری کرسکیں۔ حکومت نے اس کمی سے ہونے والے محصولات کے خسارے کا تخمینہ 48 ہزار کروڑ روپے لگایا ہے، تاہم یہ فائدہ براہ راست عوام تک منتقل ہوگا۔ وزیر خزانہ نرملا سیتا رمن نے کہا کہ یہ اصلاحات جی ایس ٹی کے نفاذ کے بعد سب سے زیادہ صارف دوست اقدام ہے جو شہری اور دیہی گھرانوں کے اخراجات میں حقیقی کمی لائے گا۔
