حکومت نے منریگا پر چلایا بلڈوزر، غریبوں کے روزگار پر حملہ: سونیا گاندھی

نئی دہلی، 20 دسمبر:۔ (ایجنسی) کانگریس پارلیمانی پارٹی (سی پی پی) کی چیئرپرسن سونیا گاندھی نے منریگا (مہاتما گاندھی نیشنل رورل ایمپلائمنٹ گارنٹی قانون) میں ترمیم پر سخت ردعمل ظاہر کرتے ہوئے کہا ہے کہ مرکزی حکومت نے اس فلاحی قانون پر بلڈوزر چلا دیا ہے۔ دہلی سے جاری ایک ویڈیو پیغام میں انہوں نے کہا کہ منریگا محض ایک سرکاری اسکیم نہیں بلکہ دیہی ہندوستان کے غریب، محروم اور بے زمین طبقات کے لیے روزگار کے قانونی حق کی ضمانت تھا، جسے کمزور کر دیا گیا ہے۔ سونیا گاندھی نے یاد دلایا کہ تقریباً 20 برس قبل ڈاکٹر منموہن سنگھ کی قیادت میں پارلیمنٹ نے منریگا قانون کو اتفاقِ رائے سے منظور کیا تھا۔ ان کے مطابق یہ ایک انقلابی قدم تھا جس سے کروڑوں دیہی خاندانوں کو فائدہ پہنچا، نقل مکانی میں کمی آئی، گرام پنچایتوں کو طاقت ملی اور مہاتما گاندھی کے گرام سوراج کے تصور کو عملی شکل دینے کی سمت مضبوط پیش رفت ہوئی۔ انہوں نے کہا کہ گزشتہ 11 برسوں میں موجودہ حکومت نے منریگا کو کمزور کرنے کی مسلسل کوششیں کیں، حالانکہ کووِڈ کے مشکل دور میں یہی قانون غریب طبقے کے لیے سہارا ثابت ہوا۔ سونیا گاندھی کے مطابق افسوسناک پہلو یہ ہے کہ حال ہی میں نہ صرف منریگا سے مہاتما گاندھی کا نام ہٹا دیا گیا بلکہ قانون کی ساخت اور طریقۂ کار کو بھی بغیر کسی وسیع مشاورت، بحث یا اپوزیشن کو اعتماد میں لیے یکطرفہ طور پر بدل دیا گیا۔ ویڈیو پیغام میں انہوں نے کہا کہ اب یہ فیصلہ دہلی میں بیٹھ کر کیا جائے گا کہ کس کو، کہاں، کتنا اور کس طرح روزگار ملے گا، جو زمینی حقیقت سے مطابقت نہیں رکھتا۔ ان کے بقول منریگا کو لانے اور نافذ کرنے میں کانگریس کا کردار ضرور تھا مگر یہ کبھی پارٹی مفاد کی اسکیم نہیں رہی، بلکہ ملک اور عوام کے مفاد سے جڑی ایک جامع پالیسی تھی۔ سونیا گاندھی نے کہا کہ اس قانون کو کمزور کر کے حکومت نے کروڑوں کسانوں، مزدوروں اور دیہی غریبوں کے مفادات پر ضرب لگائی ہے۔ انہوں نے اعلان کیا کہ اس ’کالے قانون‘ (وکست بھارت جی رام جی) کے خلاف کانگریس بھرپور جدوجہد کرے گی۔ آخر میں انہوں نے کہا کہ جیسے 20 برس قبل غریبوں کے روزگار کے حق کے لیے آواز اٹھائی تھی، ویسے ہی آج بھی وہ اس جدوجہد کے لیے پُرعزم ہیں اور پارٹی کے تمام قائدین و کارکن عوام کے ساتھ کھڑے ہیں۔