یو پی کےوزیر اعلیٰ یوگی کی وزیر اعظم سے ملاقات
نئی دہلی، 05 جنوری (یو این آئی) اتر پردیش کے وزیر اعلیٰ یوگی آدتیہ ناتھ نے پیر کے روز یہاں وزیر اعظم نریندر مودی سے ملاقات کی اور انہیں ایودھیا کے رام مندر کی ایک شبیہ بطور تحفہ پیش کی۔وزیر اعظم کے دفتر(پی ایم او) نے اس ملاقات کی اطلاع دی ہے۔ پی ایم او نے سوشل میڈیا پلیٹ فارم ’ایکس‘ پر دونوں رہنماؤں کی ملاقات کی تصاویر شیئر کی ہیں۔ ایک تصویر میں مسٹر یوگی وزیر اعظم کو رام مندر کی شبیہ پیش کر رہے ہیں۔ یہ ملاقات ایک ایسے وقت میں ہوئی ہے جب اتر پردیش اسمبلی انتخابات میں صرف ایک سال کا وقت رہ گیا ہے اور ریاست میں کابینہ کی توسیع کی بازگشت سنائی دے رہی ہے۔وزیر اعلیٰ یوگی آدتیہ ناتھ نے بھی اس ملاقات کی تصویریں شیئر کرتے ہوئے اسے ایک خیر سگالی کی ملاقات قرار دیا۔ انہوں نے ایکس پر لکھا، ’’آج نئی دہلی میں عزت مآب وزیر اعظم نریندر مودی سے ملاقات کر کے ان کی رہنمائی حاصل کی۔ آپ کی رہنمائی ’نئے اتر پردیش‘ کے ترقیاتی سفر کو مزید تیز کرنے کے لیے ہمیشہ نئی توانائی فراہم کرتی ہے۔ اپنا قیمتی وقت دینے کے لیے آپ کا تہہ دل سے شکریہ وزیر اعظم جی!‘‘
