اہل خانہ کے چہرے پرآئی خوشی
نئی دہلی، 19 جون (ہ س)۔ بھارت کے ’آپریشن سندھو‘ کے تحت جنگ زدہ ایران سے نکالے گئے 110 ہندوستانی طلبہ بحفاظت گھر پہنچ گئے ہیں۔ انہیں پہلے ایران سے آرمینیا لے جایا گیا۔ وہاں سے انہیں ہوائی جہاز کے ذریعے نئی دہلی لایا گیا۔ ان کی پہلی پرواز آج صبح سویرے قومی دارالحکومت پہنچی۔ ایران میں ہندوستانی سفارت خانے نے انہیں آرمینیا پہنچنے میں مدد کی۔ اپنے بچوں کو محفوظ اور صحت مند دیکھ کرگھروالوں کے چہرے کھل اٹھے۔ ان میں سے زیادہ تر طلبا کا تعلق جموں و کشمیر سے ہے۔ ایران سے اپنے وطن پہنچنے والے طالب علم یاسر غفار نے کہا کہ وہ اپنے ملک واپس آ کر بہت خوش ہیں۔ ایران کے حالات بالکل اچھے نہیں ہیں۔ طالبہ غزل نے اس کے لیے ہندوستانی سفارت خانے کا شکریہ ادا کیا ہے۔ مریم روز نے کہا کہ ہندوستانی سفارت خانے نے بہت مدد کی۔ انہوں نے ہمیں کسی قسم کی پریشانی کا سامنا نہیں ہونے دیا۔ وہ تین دن کا سفر مکمل کر کے گھر پہنچ گئے ہیں۔جموں و کشمیر اسٹوڈنٹس یونین نے انخلا کی کارروائی شروع کرنے پر وزیر اعظم نریندر مودی اور وزیر خارجہ ایس جے شنکر کا شکریہ ادا کیا ہے۔ طلبہ یونین نے کہا ہے کہ امید ہے کہ بقیہ طلبہ کو بھی جلد نکال لیا جائے گا۔ ایران میں ایم بی بی ایس کے طالب علم 21 سالہ معاذ حیدر کے والد حیدر علی نے اس کے لیے بھارتی حکومت بالخصوص وزیر اعظم مودی کی تعریف کی ہے۔قابل ذکر ہے کہ ایران میں تقریباً 10,000 ہندوستانی شہری ہیں۔ ان میں سے تقریباً 1500 سے 2000 طلبا ہیں۔ تقریباً 6000 لوگ وہاں ایک طویل عرصے سے رہ رہے ہیں اور کام کر رہے ہیں۔ اس سے قبل کل، ایران میں ہندوستانی سفارت خانے نے ایکس پر ایک پیغام دیا تھا، ’’تمام ہندوستانی شہری جو تہران میں ہیں اور سفارت خانے سے رابطے میں نہیں ہیں، ان سے درخواست ہے کہ وہ فوری طور پر تہران میں ہندوستانی سفارت خانے سے رابطہ کریں اور اپنا مقام اور رابطہ نمبر فراہم کریں۔برائے مہربانی رابطہ کریں- +989010144557; +989128109115; +989128109109۔
