ریاستی شراونی میلہ 2025 کی تیاریوں پر وزیر سدیو کمار کی اعلیٰ سطحی جائزہ میٹنگ
عقیدت، سہولت، تحفظ اور ٹیکنالوجی کا سنگم ہوگا اس بار کا شراونی میلہ
جدید بھارت نیوز سروس
دیوگھر، 6 مئی:۔ جھارکھنڈ کے شہری ترقی و سیاحت کے وزیر جناب سدیو کمار نے کہا ہے کہ شراونی میلہ ریاست کی پہچان ہے اور یہ لاکھوں عقیدت مندوں کے جذبات و عقیدت سے جڑا ہوا ہے۔ جھارکھنڈ حکومت 11 جولائی سے 9 اگست 2025 تک منعقد ہونے والے راجکیہ شراونی میلہ کے کامیاب انعقاد کے لیے پوری طرح پرعزم ہے۔ انہوں نے کہا کہ “عقیدت، نظام اور تکنیک کا سنگم” اس بار کے میلہ کی خاص پہچان ہوگی۔ یہ بات انہوں نے منگل کے روز دیوگھر پریسدن میں شراونی میلہ 2025 کی تیاریوں کو لے کر منعقد ایک اعلیٰ سطحی جائزہ میٹنگ میں کہی۔
پیر کے دن وی آئی پی/وی وی آئی پی درشن پر مکمل پابندی
وزیر نے اعلان کیا کہ عقیدت مندوں کو برابری کا موقع دینے کے لیے اس بار تمام پیر کے دن وی آئی پی یا وی وی آئی پی درشن پر مکمل طور پر پابندی عائد رہے گی۔ انہوں نے ہدایت دی کہ میلہ کے پورے علاقے میں عقیدت مندوں کے لیے صحت مرکز، اطلاعات و امدادی مراکز، ٹینٹ سٹی، پینے کے پانی، غسل خانے، بیت الخلاء، کوڑا دان، صفائی، مصنوعی بارش (مسٹ کولنگ)، تزئین و آرائش اور گیٹ کے مناسب انتظامات کیے جائیں۔
سیکیورٹی اور نظم و قانون پر خاص زور
جائزہ کے دوران وزیر سدیو کمار نے سیکیورٹی امور جیسے کہ او پی، ٹریفک کنٹرول سینٹر، جرائم پر قابو، گاڑیوں کی پارکنگ اور روٹ لائننگ پر تفصیل سے تبادلۂ خیال کیا۔ انہوں نے بجلی، شہری ترقی، پینے کا پانی، صفائی، صحت، عوامی رابطہ، سیاحت، تعمیرات و دیگر متعلقہ محکموں کو ہدایت دی کہ تمام کام وقت پر اور اعلیٰ معیار کے ساتھ مکمل کیے جائیں تاکہ عقیدت مندوں کو سہولت حاصل ہو۔
ٹیکنالوجی کا بھرپور استعمال ہوگا اس بار
وزیر نے واضح ہدایت دی کہ اس بار شراونی میلہ میں ٹیکنالوجی کا وسیع استعمال کیا جائے گا۔ اس میں AI پر مبنی انٹیگریٹڈ میلہ کنٹرول روم، AI چیٹ بوٹ برائے معلومات، فیڈبیک و ہیلپ لائن، AI پر مبنی ٹریفک مینجمنٹ سسٹم، QR کوڈ فیڈبیک سسٹم، لوکیشن بیسڈ حاضری نظام، اور ڈیجیٹل پویلین شامل ہوں گے۔
میٹنگ میں سیاحت سکریٹری، دیوگھر و دمکا کے ڈپٹی کمشنر، سیاحت ڈائریکٹر اور دیگر محکموں کے سینئر افسران موجود تھے۔
