کونسلنگ میں دھاندلی، غلط خریداری اور طبی سہولیات کی کمی پر ارکان اسمبلی کا سخت مؤقف
جدید بھارت نیوز سروس
رانچی، 9 دسمبر:۔ رانچی میں منگل کو جھارکھنڈ اسمبلی کا سوالیہ اجلاس نسبتاً پُرسکون ماحول میں شروع ہوا۔ کارروائی کے آغاز پر ہی قائدِ حزب اختلاف بابلولال مرانڈی نے میڈیکل کونسلنگ میں مبینہ بے ضابطگیوں کا سنگین مسئلہ اٹھایا۔ ان کا کہنا تھا کہ جے پی ایس سی کے پورٹل کو این پی اے کے پورٹل سے نہ جوڑنے کی وجہ سے ہی دھاندلی کے مواقع پیدا ہو رہے ہیں۔انہوں نے مطالبہ کیا کہ دونوں پورٹلز کو فوری طور پر منسلک کیا جائے تاکہ میڈیکل کونسل کے رہنما اصولوں پر پوری طرح عمل ہو سکے۔
سپورٹنگ ڈیوائس کی جگہ غلط آلہ خریدنے کا انکشاف
بھاجپا کے رکنِ اسمبلی راج سنہا نے ایک اور اہم مسئلہ اٹھاتے ہوئے بتایا کہ معمر شہریوں کے لیے آرتھوپیڈک کیلیپرز خریدے جانے تھے لیکن اس کی جگہ ورنیئر کیلیپرز جیسے ناپ تول کے آلات خریدے گئے۔وزیرِ صحت عرفان نے جواب دیتے ہوئے کہا کہ معاملے کی جانچ جاری ہے اور رپورٹ سامنے آنے پر مناسب کارروائی کی جائے گی۔ انہوں نے یہ بھی واضح کیا کہ یہ “گھوٹالہ” نہیں کہلا سکتا کیونکہ متعلقہ سامان کی قیمت صرف 2 لاکھ 48 ہزار 500 روپے تھی۔ وزیر نے اس بات کا اعتراف بھی کیا کہ لال دیو رَجک نامی شخص نے محکمہ کو گمراہ کیا تھا۔
راج محل میں ٹراما سینٹر بند، عوام مشکلات میں مبتلا
جھامومو کے رکنِ اسمبلی محمد تاج الدین نے راج محل سب ڈویژنل اسپتال میں ٹراما سینٹر کے غیر فعال ہونے کا معاملہ اٹھایا۔ انہوں نے کہا کہ حادثات کے وقت فوری طبی امداد نہ ملنے کے سبب قیمتی جانیں ضائع ہو رہی ہیں۔ اس پر وزیر عرفان نے یقین دلایا کہ وہ خود موقع پر جا کر معائنہ کریں گے۔ انہوں نے یہ بھی تسلیم کیا کہ ڈاکٹروں کی شدید کمی کے باعث مرکز کا باقاعدہ آپریشن ممکن نہیں ہو پارہا، اور حکومت اس مسئلے کو سنجیدگی سے لے رہی ہے۔
ڈیگری کالج میں اساتذہ کی کمی، طلبہ کا مستقبل داؤ پر
بھاجپا کے رکنِ اسمبلی امِت کمار یادو نے ہزاری باغ کے برکٹٹا ڈگری کالج میں اساتذہ اور غیر تدریسی عملے کی عدم موجودگی کا مسئلہ اٹھایا۔ ان کے مطابق بغیر کسی مناسب انتظام کے داخلے لے لیے گئے، جس سے طلبہ کا مستقبل خطرے میں پڑ گیا ہے۔وزیر سدیوی نے وضاحت دی کہ کالج میں قائم مقام پرنسپل کی تقرری ہو چکی ہے اور بھرتی کا عمل وقت لیتا ہے، تاہم اسے درست کر دیا جائے گا۔انہوں نے بتایا کہ بھرتی شروع ہوتے ہی اکثر سی بی آئی تحقیق یا عدالتی رکاوٹیں پیدا ہو جاتی ہیں۔ اگر والدین چاہیں تو طلبہ کو دوسری جگہ ایڈجسٹ کیا جا سکتا ہے۔
کڈنی مریضوں کو ناقص سہولیات پر شدید اعتراض
بھاجپا کی رکنِ اسمبلی راگنی سنگھ نے ایس این ایم سی ایچ اور دیگر اضلاع میں گردوں کے مریضوں کو مناسب علاج نہ ملنے کی شکایت کی۔ انہوں نے کہا کہ اسپتالوں میں گندگی عام ہے، مشینیں خراب ہیں، ڈائیلاسس کا عمل متاثر ہے۔وزیر عرفان نے بتایا کہ سہولیات کو جلد نئی عمارت میں منتقل کیا جائے گا اور حکومت اس سلسلے میں سنجیدہ اقدامات کر رہی ہے۔ انہوں نے وعدہ کیا کہ وہ جلد ہی متعلقہ رکنِ اسمبلی کے ساتھ اسپتال کا معائنہ کریں گے اور تمام انتظامات بہتر بنائیں گے۔
