جدید بھارت نیوز سروس
جمشیدپور، 25 مئی :۔ پوٹکا کے پھولجھڑی گاؤں میں دل دہلا دینے والے حادثے نے پورے گاؤں کو سوگ میں ڈوبا دیا۔ بطخوں کے ساتھ کھیلنے اور ان کا پیچھا کرنے کے دوران دو معصوم بچے تین سالہ رسمیتا سردار اور ڈیڑھ سالہ آشیش سردار ڈوبھا (گڑھے) کے گہرے پانی میں ڈوب گئے جس سے ان کی موت ہو گئی۔ واقعہ اس وقت پیش آیا جب بچوں کی والدہ گھر کے کاموں میں مصروف تھیں اور آس پاس کوئی نہیں تھا۔ گاؤں والوں نے بچوں کو پانی میں تیرتے دیکھا اور انہیں بچانے کی کوشش کی لیکن تب تک بہت دیر ہو چکی تھی۔ کوولی تھانہ علاقے کے تحت ہرینا پنچایت کے پھولجھاری گاؤں میں ہفتہ کی دوپہر ایک بجے کے قریب ایک افسوسناک واقعہ نے پورے علاقے کو ہلا کر رکھ دیا۔ سنجیت سردار کی تین سالہ بیٹی رسمیتا سردار اور اس کے بھائی راجیش سردار کا ڈیڑھ سالہ بیٹا آشیش سردار جو بھائی بہن تھے گھر کے قریب کھیل رہے تھے۔ کھیل کے دوران دونوں بچے ایک بطخ کا پیچھا کرتے ہوئے گھر سے کچھ فاصلے پر واقع ڈوبھا (گڑھے) کی طرف چلے گئے۔ جیسے ہی بطخ پانی میں داخل ہوئی دونوں معصوم بچوں نے اسے پکڑنے کے لیے تالاب میں چھلانگ لگا دی۔ گہرے پانی اور بچوں کی کم عمری کے باعث حادثہ پیش آیا اور دونوں ڈوب گئے۔ اس وقت بچوں کی والدہ کھانا بنانے میں مصروف تھیں جس کی وجہ سے بچوں کی طرف توجہ نہیں دے رہی تھیں۔ کچھ دیر بعد تالاب کے پاس سے گزرنے والے ایک دیہاتی نے بچوں کو پانی میں تیرتے ہوئے دیکھا۔ اس نے فوراً گاؤں والوں کو اس کی اطلاع دی۔ اطلاع ملتے ہی گاؤں والے اور بچوں کے والدین موقع پر پہنچ گئے۔ دونوں بچوں کو فوری طور پر پانی سے نکال کر ہاتا کے تارا سیوا سدن نرسنگ ہوم لے جایا گیا۔ جانچ کے بعد وہاں کے ڈاکٹروں نے دونوں بچوں کو مردہ قرار دے دیا۔
بطخ کا پیچھا کر رہے دو معصوم بچے ڈوبھا میں ڈوب کر ہلاک
