رانچی میں چند گھنٹوں کے اندر دو انکاؤنٹر

Two encounters within a few hours in Ranchi

دونوں مقابلوں میں پولیس کامیاب ؛ دو جرائم پیشہ کو گولی لگی دیگر دو گرفتار

جدید بھارت نیوز سروس
رانچی، 13 اکتوبر: دارالحکومت کی پولیس کی طاقت کا مظاہرہ جاری ہے۔ سوموار کو چند گھنٹوں کے اندر دو مختلف انکاؤنٹر ہوئے جن میں پولیس نے بڑی کامیابی حاصل کی۔ پہلا انکاؤنٹر رانچی کے بالشیرنگ کے قریب ہوا جہاں سوجیت سنہا گینگ کے مجرموں سے مڈبھیڑ ہوئی۔ اس واقعے میں ایک مجرم زخمی جبکہ دو کو گرفتار کر لیا گیا۔ جائے وقوعہ سے تین ہتھیار بھی برآمد کیے گئے۔ چند گھنٹے بعد دوسرا انکاؤنٹر میک کلسکی گنج تھانہ علاقے میں پیش آیا۔ پولیس کی کارروائی میں پربھات رام نامی جرائم پیشہ شخص زخمی ہو گیا، جب کہ اس کا ساتھی سنجے رام گرفتار ہوا۔ جائے وقوعہ سے ایک کاربائن، ایک پستول اور ایک موٹر سائیکل برآمد کی گئی۔رانچی دیہی پولیس سپرنٹنڈنٹ پروین پشکر نے واقعے کی تصدیق کرتے ہوئے بتایا کہ پولیس کو اطلاع ملی تھی کہ کچھ جرائم پیشہ افراد رنگداری کی غرض سے علاقے میں گھوم رہے ہیں۔ اس اطلاع پر گشت بڑھا دی گئی۔ پولیس نے جب ایک مشتبہ موٹر سائیکل سوار کو رکنے کا اشارہ کیا، تو انہوں نے پولیس جیپ پر فائرنگ کر دی۔ جوابی کارروائی میں پربھات رام زخمی ہو گیا، جسے ہسپتال میں داخل کرا دیا گیا ہے۔ پولیس کے مطابق پربھات رام کا گروہ ٹی پی سی کے نام پر دہشت پھیلا کر اینٹ بھٹہ اور کوئلے کے تاجروں سے بھتہ وصول کرتا تھا۔ ادائیگی نہ کرنے پر وہ فائرنگ کے ذریعے خوف پھیلاتے تھے، اور تاجروں کو دھمکی آمیز خطوط بھیجتے تھے۔ سوموار کے روز یہ گینگ کسی سے رقم وصول کرنے نکلا تھا، لیکن پولیس نے بروقت کارروائی کرتے ہوئے انہیں گھیر لیا۔ فی الحال پورے علاقے میں گشت مزید تیز کر دیا گیا ہے تاکہ قانون و نظم برقرار رہے۔