تین اضلاع کے ویلفیئر افسران کو وجہ بتائونوٹس جاری
جدید بھارت نیوز سروس
رانچی، یکم دسمبر:۔پری میٹرک اور پوسٹ میٹرک اسکالرشپ کی تقسیم کی سست رفتار پر فلاحی وزیر چمرا لنڈا نے شدید ناراضگی کا اظہار کیا۔ اسکالرشپ اسکیم کی جائزہ میٹنگ کے دوران وزیر نے متعلقہ افسران کو سخت ہدایات دیتے ہوئے کہا کہ کسی بھی صورت میں طلبہ کو ان کی اسکالرشپ ملنے میں تاخیر نہیں ہونی چاہیے۔
کئی اضلاع میں تشویشناک صورتحال
جائزہ کے دوران یہ بات سامنے آئی کہ مالی سال 2024-25 میں بوکارو، چترا اور گریڈیہہ اضلاع میں پری میٹرک (جماعت 1 تا 8، اور 9 تا 10) اور پوسٹ میٹرک اسکالرشپ کی تقسیم نہایت سست ہے۔ اس صورتحال پر برہمی ظاہر کرتے ہوئے فلاحی وزیر نے ان تینوں اضلاع کے ضلعی فلاحی افسران کو وجہ بتاؤ نوٹس جاری کرنے کا حکم دیا۔
وقت پر ادائیگی کی سخت ہدایت
فلاحی وزیر چمرا لنڈا نے ضلعی فلاحی افسران کو ہدایت دی کہ موجودہ تعلیمی سیشن کے اختتام سے قبل ہر حال میں اسکالرشپ کی ادائیگی مکمل کی جائے۔ ساتھ ہی، تمام اضلاع کے ڈپٹی کمشنرز کو بھی ہدایت دی گئی کہ ضلع سطح کی کمیٹی کی میٹنگ بروقت منعقد کرکے زیر التوا درخواستوں کو فوری منظوری دی جائے۔
سرکاری اعداد و شمار پر سوالات
طلبہ تنظیم کا کہنا ہے کہ حکومت کے اعداد و شمار کے مطابق 11.34 لاکھ طلبہ کو اسکالرشپ ملنی تھی، لیکن اب تک صرف 7.45 لاکھ طلبہ کو ہی جزوی ادائیگی ہو پائی ہے، جبکہ باقی لاکھوں طلبہ تاحال انتظار میں ہیں۔
مرکزی فنڈ کی عدم دستیابی کا مسئلہ
ایک طلبہ یونین نے دعویٰ کیا کہ 7 لاکھ 45 ہزار 557 طلبہ کو 1202.89 کروڑ روپے ادا کیے گئے ہیں، جو گزشتہ سیشنز کا صرف جزوی حصہ ہے۔ مزید کہا گیا کہ موجودہ سیشن میں 3.5 لاکھ سے زائد او بی سی اور دیگر طلبہ کو ایک بھی قسط نہیں ملی۔ طلبہ یونین نے الزام لگایا کہ مرکزی حکومت نے اپنے حصے کے تقریباً 900 کروڑ روپے جاری نہیں کیے، جس وجہ سے ریاستی حکومت مکمل ادائیگی کرنے سے قاصر ہے۔
