کیشو مہتو کملیش اور راجیش ٹھاکر کا بوکارو دورہ: کارکنوں کو میئر امیدوار کے حق میں متحد ہونے کی ہدایت
جدید بھارت نیوز سروس
بوکارو،8؍فروری: چاس نگر نگم کے میئر کے عہدے کے لیے سیاسی میدان سج چکا ہے۔ میونسپل عام انتخابات 2026 کے تحت میئر کے عہدے کے لیے میدان میں اترے 31 امیدواروں کو انتخابی نشانات الاٹ کر دیے گئے ہیں، جس کے ساتھ ہی اب چاس کی سڑکوں، گلیوں اور چوراہوں پر انتخابی شور تیز ہونے کے امکانات ہیں۔دوسری جانب کانگریس کے ریاستی صدر کیشو مہتو کملیش اور سابق ریاستی صدر راجیش ٹھاکر نے بوکارو کے ایم ایل اے، بیرمو کے ایم ایل اے، ضلع صدر اور دیگر کے ساتھ میٹنگ کی، جس میں سب کو ہدایات دی گئی ہیں کہ میئر امیدوار جمیل اختر کو جتانا ہے، تاکہ میونسپل کارپوریشن کے انتخابات میں کانگریس کو جیت مل سکے۔ریاستی کانگریس صدر نے بتایا کہ جھارکھنڈ میں 48 میونسپل باڈیز کے انتخابات ہو رہے ہیں اور یہ انتخابات پارٹی کی بنیاد (دلگت) پر نہیں ہو رہے ہیں۔ بوکارو میں ہمارے حمایت یافتہ امیدوار جمیل انصاری ہیں۔ سب کی رائے سے ان کے حق میں بات آئی ہے۔ ان کا انتخابی نشان ’قالین‘ ہے، انہیں زیادہ سے زیادہ ووٹوں سے کیسے کامیاب بنایا جائے، اس حوالے سے کمیٹی نے غور و خوض کیا ہے۔ ہمارے ضلع صدر، سکریٹری، ایم ایل اے اور ضلع کے سابق صدور نے بھی نامزدگی داخل کی تھی۔بوکارو کے ایم ایل اے کی حمایت بھی ہمارے حمایت یافتہ امیدوار کو مل گئی ہے۔ ہم لوگوں کے مسائل حل کریں گے۔ اسی تناظر میں اتوار کو ہم بوکارو پہنچے۔ گریڈیہہ، دھنباد، جمشید پور، دیوگھر میں اچھے امیدوار لڑ رہے ہیں اور وہاں کے شہریوں کی بھرپور حمایت ہمیں مل رہی ہے۔ پی اے سی کمیٹی کی ذمہ داری ہے کہ وہ ہمارے حمایت یافتہ امیدوار کو زیادہ سے زیادہ ووٹ دلا کر کامیاب بنانے کا کام کرے۔ اسی سلسلے میں ہم نے یہاں مشاورت کی ہے۔کانگریس کے ریاستی صدر کیشو مہتو کملیش نے کہا کہ “یہ الیکشن پارٹی کی بنیاد پر نہیں ہو رہا ہے، اس کے باوجود جو لوگ پارٹی سے وابستہ ہیں یا پارٹی کے کسی ونگ سے ہیں، تمام لوگ انہیں سمجھانے کی کوشش کریں گے اور پارٹی کے حمایت یافتہ امیدوار کو جتانے کا کام کریں گے۔ اس کے باوجود اگر وہ نہیں مانتے تو ان کے خلاف سخت سے سخت کارروائی ہو گی”۔اس معاملے پر سابق ریاستی صدر راجیش ٹھاکر نے بتایا کہ بلدیاتی انتخابات ہو رہے ہیں اور اسی تناظر میں جو سرشار امیدوار ہیں، ان کے لیے ہمارے ریاستی صدر اور دیگر عہدیدار یہاں آئے ہیں اور پی اے سی کمیٹی بھی موجود ہے۔
تمام لوگ مل کر پارٹی کے حمایت یافتہ امیدوار کو کس طرح کامیاب بنائیں، اس کے لیے ہم کوشاں ہیں۔
