جھارکھنڈ پردیش کانگریس کمیٹی کے وفد نے ریاستی چیف الیکٹورل آفیسرکو میمورنڈم پیش کیا
جدید بھارت نیوز سروس
رانچی 26 اکتو بر : جھارکھنڈ پردیش کانگریس کمیٹی کے ایک وفد نے آج الیکشن کمیشن کے ریاستی چیف الیکٹورل آفیسر سے ملاقات کی اور ایک میمورنڈم اور ایک پین ڈرائیو سونپا، جس میں بی جے پی کی جانب سے جامتاڑا سے کانگریس امیدوار ڈاکٹر عرفان کے خلاف لگائے جانے والے الزامات کی حقیقت درج تھی۔کانگریس لیڈر ڈاکٹر راجیش گپتا “چھوٹو” راجن ورما اور ریاستی کانگریس کے چیف ترجمان لال کشور ناتھ شاہد دیو نے کہا کہ ڈاکٹرعرفان انصاری ہمیشہ بی جے پی لیڈروں کے نشانے پر رہتے ہیں۔ ان پر لگایا گیا الزام بے بنیاد ہے، بی جے پی انتخابات میں باقی رہنے کے مقصد سے اس طرح کا الزام لگا رہی ہے۔ ہم سب جانتے ہیں کہ لوک سبھا انتخابات میں بھی بی جے پی جامتاڑا اسمبلی حلقہ سے بھاری ووٹوں سے ہار گئی تھی۔کانگریس کے وفد نے الیکشن کمشنر کو بتایا کہ بی جے پی کی طرف سے سوشل میڈیا پر گمراہ کن ویڈیوز پھیلائی جا رہی ہیں۔ سوشل میڈیا پر اس مسخ شدہ ویڈیو کو گردش کر کے کانگریس امیدوار اور پارٹی کی شبیہ کو خراب کرنے کی کوشش کی جا رہی ہے۔ اصل ویڈیو میں ڈاکٹر عرفان نے سیتا سورین کا نام تک نہیں لیا ہے اور نہ ہی کوئی نامناسب زبان استعمال کی ہے۔ اس کے باوجود بی جے پی نے سیاسی فائدہ حاصل کرنے کے لیے اس ویڈیو کو توڑ مروڑ کر پھیلایا ہے، جس سے عوام میں کانگریس امیدوار کی غلط شبیہ پیدا کرنے کی کوشش کی گئی ہے۔ ڈاکٹر عرفان انصاری کا تعلق اقلیتی برادری سے ہے اور ان کی مقبولیت صرف اقلیتوں میں ہی نہیں بلکہ تمام برادریوں میں ہے، ایسے میں نہ صرف ڈاکٹر عرفان انصاری کی بلکہ پارٹی کی شبیہ کو ٹھیس پہنچی ہے۔ جو جامتاڑہ کے عوام کو گمراہ کرنے کی سوچی سمجھی سازش ہے۔اسی طرح کا جھوٹا پروپیگنڈہ بی جے پی امیدوار سیتا سورین اور ان کی بیٹی نے لوک سبھا انتخابات کے دوران بھی کیا تھا۔ اس وقت انہوں نے اسمبلی اسپیکر اور نالہ ایم ایل اے رویندر ناتھ مہتو اور ان کے بیٹے کے خلاف جھوٹے الزامات لگائے تھے، جو تحقیقات کے بعد جھوٹے پائے گئے۔پارٹی نے زور دیا کہ مستقبل میں کسی بھی قسم کے جھوٹے اور گمراہ کن پروپیگنڈے کو روکنے کے لیے سخت ترین اقدامات کیے جائیں تاکہ انتخابی عمل صاف اور شفاف رہے اور مستقبل میں ایسے واقعات کا اعادہ نہ ہو سکے۔
