خواتین کے حقوق کو محض قانون تک محدود نہ رکھیں، انہیں حقیقت میں بدلیں: سبودھ کانت سہائے
جدید بھارت نیوز سروس
رانچی، 08؍ مارچ: بین الاقوامی یوم خواتین کے موقع پر پریس کلب، رانچی میں آئی۔ ایل۔ اے- اے۔ (انیشیٹو فار لیگل اویئرنس اینڈ اسسٹنس ٹرسٹ) کی جانب سے “ایکسلریٹ ایکشن: ٹرانسفارمنگ ویمن رائٹس ان ٹو لوڈ ریئیلٹی امیڈسٹ آن گوئنگ چیلنجز” کے موضوع پر خواتین کے اعزاز میں ایک خصوصی پروگرام کا انعقاد کیا گیا۔اس تقریب میں خواتین کی موجودہ صورتحال، ان کے لیے دستیاب قانونی تحفظ اور ان کے سامنے درپیش سماجی و ادارہ جاتی چیلنجوں پر مختلف مقررین نے اپنے خیالات پیش کیے۔پروگرام میں مہمان خصوصی کے طور پر سینئرسیاست داں اور سابق مرکزی وزیر سبودھ کانت سہائے کی باوقار موجودگی رہی۔مقررین میں ایڈوکیٹ دیویہ پرکاش نے “ایکسلریٹ ایکشن ٹوورڈز ویمن اے ہولیسٹک اپروچ” کے موضوع پر خیالات کا اظہار کرتے ہوئے خواتین کے حقوق کو عملی طور پر نافذ کرنے کی ضرورت پر زور دیا۔پروفیسر سواتی نے “خواتین کی جدوجہد کی تاریخ” پر روشنی ڈالتے ہوئے خواتین کے حقوق کے تاریخی سفر کی نشاندہی کی۔ امل آزاد نے جھارکھنڈ میں رائج غیر انسانی بدفعلی ‘ڈائن بساہی ‘ کے سماجی اثرات پر اپنی بات رکھی۔پروفیسر رجنی مرمو، قبائلی نسائی مفکر، نے قبائلی خواتین کے حقوق اور سماجی شناخت سے جڑے مسائل پر اپنے خیالات شیئر کیے۔محترمہ نیپا بسو نے کام کی جگہوں پر ‘پوش ایکٹ ‘ (POSH Act) کے موثر نفاذ پر اہم خیالات پیش کیے۔ڈاکٹر ونیتا سنگھ، پرنسپل، ویمنز کالج، نے تعلیم کے ذریعے خواتین کو بااختیار بنانے پر زور دیا۔محترمہ الوکا کجونر، سماجی و سیاسی کارکن، نے بھارت کی جیلوں میں خواتین کی صورتحال اور حقوق پر اپنے خیالات کا اظہار کیا۔مزید برآں سبھروتو چٹرجی نے “وار اینڈ ویمن” کے موضوع پر اور ارون جی نے بھی خواتین سے جڑے ہم عصر سماجی سوالات پر اپنے خیالات پیش کیے۔سابق مرکزی وزیر سبودھ کانت سہائے نے خواتین کو بااختیار بنانے اور ان کے روزگار کے مواقع کو مستحکم کرنے کی ضرورت پر اپنے خیالات کا اظہار کیا۔پروگرام میں موجود تمام مقررین اور مہمانوں نے خواتین کے حقوق، وقار اور مساوات کو یقینی بنانے کے لیے معاشرے، قانون اور اداروں کی اجتماعی ذمہ داری پر زور دیا۔پروگرام کا اختتام تمام معزز مہمانوں اور شرکاء کا شکریہ ادا کرتے ہوئے کیا گیا۔اس پروگرام کی کامیابی میں آرگنائزنگ کمیٹی کا اہم کردار رہا، جس میں پروفیسر سچن اندیور، محترمہ ہیما گائیکواڑ، نشاد خان، محترمہ پریا ساؤ اور آرین کا خصوصی تعاون رہا۔
