شاہنواز حسن کی وزیر اعلیٰ ہیمنت سورین سے ملاقات
جدید بھارت نیوز سروس
رانچی ، 16؍ مارچ:، 16؍ مارچ: بھارتی شرمجیوئی پترکار سنگھ (BSPS) اور جھارکھنڈ جرنلسٹ ایسوسی ایشن (JJA) کے بانی شاہنواز حسن نے آج جھارکھنڈ اسمبلی میں وزیر اعلیٰ ہیمنت سورین سے ملاقات کی اور صحافیوں کے مفادات (صحافی پنشن اسکیم، صحافی ہیلتھ انشورنس اسکیم اور جرنلسٹ پروٹیکشن ایکٹ) کے حوالے سے زیر التوا مطالبات کو پورا کرنے کا مطالبہ کیا۔ اس دوران وزیر اعلیٰ نے یقین دلایا کہ تمام مطالبات جلد پورے کیے جائیں گے۔ واضح رہے کہ جھارکھنڈ جرنلسٹ ایسوسی ایشن کی جانب سے ماضی میں جھارکھنڈ اسمبلی کے سامنے دیے گئے دھرنے کے دوران بھی وزیر اعلیٰ نے یہی یقین دہانی کرائی تھی۔ جھارکھنڈ کے صحافی گزشتہ تقریباً دو سالوں سے وزیر اعلیٰ کی اس یقین دہانی کے پورا ہونے کی امید لگائے بیٹھے ہیں۔ وہیں گزشتہ دنوں سڑک حادثے میں شدید زخمی ہونے والے جمشید پور کے فوٹو جرنلسٹ سنجیب دتا کو جھارکھنڈ جرنلسٹ ایسوسی ایشن کی پہل پر وزیر اعلیٰ ریلیف فنڈ سے ایک لاکھ روپے کی مالی امداد فراہم کی گئی۔ معلوم ہو کہ سڑک حادثے میں شدید زخمی ہونے والے صحافی طویل عرصے تک رانچی کے منی پال اسپتال میں داخل تھے، جہاں ان کے علاج پر تقریباً 25 لاکھ روپے خرچ ہوئے۔ جھارکھنڈ حکومت کی جانب سے صحافیوں سے پیسے لینے کے باوجود ہیلتھ انشورنس نہیں کیا گیا، جس کی وجہ سے صحافی سنجیب دتا کو قرض لے کر اپنا علاج کروانا پڑا۔ تنظیم کی جانب سے بھی باہمی تعاون کے ذریعے ان کی مدد کی گئی تھی۔ آج وزیر اعلیٰ سے ملاقات کرنے والوں میں رانچی ضلع صدر پنکج سنگھ، ضلع سکریٹری ہیمنت مانجھی، آکاش کمار سونی، ویر سنگھ اور دیگر صحافی موجود تھے۔
