گرم کپڑوں کا استعمال کریں اور بلا ضرورت باہر نکلنے سے گریز کریں
جدید بھارت نیوز سروس
رانچی،14؍جنوری: رانچی ضلع میں گزشتہ چند دنوں سے جاری شدید لہر اور سخت سردی کے موسم کو دیکھتے ہوئے محکمہ موسمیات (IMD)، رانچی کی جانب سے جاری کردہ خصوصی بلیٹن کی بنیاد پر، ضلعی انتظامیہ عوامی تحفظ اور صحت کے پیشِ نظر ضروری احتیاطی تدابیر اختیار کرنے کی اپیل کرتی ہے۔ڈپٹی کمشنر نیز ڈسٹرکٹ مجسٹریٹ، رانچی منجوناتھ بھجن تری نے آج ایک اپیل جاری کرتے ہوئے کہا کہ فی الحال ضلع میں کم سے کم درجہ حرارت 8 سے 10 ڈگری سیلسیس کے آس پاس ہے اور سردی کی لہر ‘یلو زون‘ میں ہے۔ ایسی صورتحال میں سردی سے پیدا ہونے والے طبی مسائل (جیسے نزلہ، کھانسی، نمونیہ، ہائپوتھرمیا وغیرہ) سے بچاؤ انتہائی ضروری ہے۔
عام عوام کے لیے اپیل اور احتیاطی تدابیر:
سردی سے بچنے کے لیے گرم کپڑے، سویٹر، جیکٹ، مفلر، ٹوپی، دستانے اور جرابیں لازمی پہنیں۔ صبح، شام اور رات کے وقت بلا ضرورت باہر نکلنے سے گریز کریں، خاص طور پر گھنی دھند کے دوران۔ گھر کے اندر ہی رہیں اور گرم مشروبات (جیسے ادرک والی چائے، سوپ وغیرہ) کا استعمال کریں۔ بزرگوں، چھوٹے بچوں اور سنگین بیماریوں میں مبتلا افراد کا خاص خیال رکھیں۔ کھلے میں آگ جلا کر براہِ راست گرم ہونے سے بچیں، اس سے سانس کے مسائل اور آگ لگنے کا خطرہ رہتا ہے۔
والدین کے لیے خصوصی اپیل:
والدین اپنے بچوں کو سردی سے بچانے کے لیے اضافی احتیاط برتیں۔ بچوں کو موٹے گرم کپڑے پہنا کر ہی گھر سے باہر بھیجیں۔ اگر بچہ طبیعت میں خرابی محسوس کرے تو فوری طور پر طبی مشورہ لیں۔ اسکول جانے والے بچوں کو وقت سے بہت پہلے گھر سے نکالنے سے گریز کریں، کیونکہ صبح کا وقت سب سے زیادہ ٹھنڈا ہوتا ہے۔
اسکول جانے والے طلبہ و طالبات کے لیے اپیل:
اسکول جاتے وقت مکمل طور پر گرم لباس میں رہیں اور ناک و منہ کو مفلر یا اسکارف سے ڈھانپیں۔ سردی سے بچاؤ کی تمام ہدایات (جیسے گرم پانی پینا، ورزش کرنا وغیرہ) پر عمل کریں۔ اگر سردی کی وجہ سے طبیعت ناساز محسوس ہو تو فوری طور پر استاد یا والدین کو مطلع کریں۔ضلعی انتظامیہ کی جانب سے صورتحال کی مسلسل نگرانی کی جا رہی ہے۔ ضرورت کے مطابق مزید ہدایات جاری کی جائیں گی۔
