ریلوے ملازم کا قاتل کوئی غیر نہیں بلکہ اپنے ہی بچے نکلے
جدید بھارت نیوز سروس
دھنباد،15؍جنوری: پمپو تالاب سے برآمد ہونے والی ریلوے ملازم بیربل کی لاش کا معمہ پولیس نے حل کر لیا ہے۔ جسے ایک عام موت سمجھا جا رہا تھا، وہ اپنوں کی ہی رچی ہوئی ایک خوفناک سازش نکلی۔ دھنباد پولیس نے اس معاملے میں مقتول ریلوے ملازم کے بیٹے روہت، بیٹی ریتو اور اس کے عاشق فردین خان کو گرفتار کر کے سلاخوں کے پیچھے بھیج دیا ہے۔پولیس کی تحقیقات میں یہ چونکا دینے والا انکشاف ہوا کہ ہیرا پور کے رہائشی ریلوے ملازم بیربل شراب نوشی کے عادی تھے۔ نشے کی حالت میں وہ اکثر گھر میں گالی گلوچ اور مار پیٹ کرتے تھے۔ روز روز کے اس جھگڑے سے تنگ آ کر ان کے بچوں نے ہی انہیں راستے سے ہٹانے کی سازش رچ ڈالی۔ یہ معلومات سٹی ایس پی ریتوک شریواستو نے جمعرات کو پریس کانفرنس میں دی۔انہوں نے بتایا کہ قتل کا پورا منصوبہ 4 جنوری کی رات کو تیار کیا گیا تھا۔ بیٹے روہت اور بیٹی کے عاشق فردین نے بیربل کو پہلے شراب میں نشہ آور دوا ملا کر پلا دی جس سے وہ بے ہوش ہو گئے۔ بے ہوشی کی حالت میں انہیں بائیک پر بٹھا کر آمٹال کے ایک سنسان علاقے میں لے جایا گیا، جہاں مفلر سے گلا گھونٹ کر ان کا بے رحمی سے قتل کر دیا گیا۔ قتل کے بعد لاش کو پمپو تالاب میں پھینک دیا گیا۔اگلے دن بیٹی آرتی نے ہی پولیس کو اطلاع دے کر یو ڈی (UD) کیس درج کرایا تھا تاکہ کسی کو شک نہ ہو۔ دھنباد تھانہ پولیس نے جب تکنیکی شواہد (CDR) اور پوسٹ مارٹم رپورٹ کا تجزیہ کیا، تو شک کی سوئی خاندان کی طرف ہی گھومی۔ ڈاکٹروں کی رپورٹ میں واضح ہوا کہ موت ڈوبنے سے نہیں بلکہ گلا گھونٹنے سے ہوئی تھی۔ اس کے بعد جب پولیس نے سختی سے پوچھ گچھ کی تو تینوں نے اپنے جرم کا اعتراف کر لیا۔ پولیس نے واردات میں استعمال ہونے والا مفلر، بائیک (نمبر: JH 10BJ 8959)، شراب کی خالی بوتل اور دیگر سامان ضبط کر لیا ہے۔ تینوں ملزمان کو جیل بھیج دیا گیا ہے۔
