منصوبوں میں معیار اور شفافیت کو یقینی بنایا جائے: ڈی سی رام نیواس یادو
جدید بھارت نیوز سروس
گریڈیہہ، 19؍ جنوری: آج کلکٹریٹ آڈیٹوریم میں ڈپٹی کمشنر (ڈی سی) رام نیواس یادو کی صدارت میں ‘ڈسٹرکٹ منرل فاؤنڈیشن ٹرسٹ ‘ (DMFT) گورننگ کونسل کا ایک اہم اجلاس منعقد ہوا۔ اس اجلاس میں ڈی ایم ایف ٹی فنڈ سے چلنے والی اسکیموں کی پیش رفت، مستقبل کی ترجیحات اور وسائل کے موثر استعمال پر تفصیلی تبادلہ خیال کیا گیا۔ اجلاس میں رکن پارلیمنٹ چندر پرکاش چودھری، ڈاکٹر سرفراز احمد، ایم ایل اے جے رام مہتو اور دیگر عوامی نمائندوں سمیت اعلیٰ حکام نے شرکت کی۔ ڈی سی نے شرکاء کو ‘پردھان منتری کھنیج شیتر کلیان یوجنا ‘ کے بارے میں بریفنگ دی، جس کے بعد ڈپٹی ڈیولپمنٹ کمشنر سمرتا کماری نے گرام سبھا سے منظور شدہ تجاویز پیش کیں۔ اجلاس کے دوران تعلیم، صحت، زراعت، اور خواتین و بچوں کی ترقی جیسے اعلیٰ ترجیحی شعبوں پر خصوصی توجہ دی گئی۔ اس کے علاوہ ماحولیاتی تحفظ، پینے کے پانی کی فراہمی، سڑکوں، پلوں، اسٹیڈیم کی تعمیر اور چوراہوں کی تزئین و آرائش سے متعلق منصوبوں کو بھی متفقہ طور پر منظور کر لیا گیا۔ڈپٹی کمشنر نے زیر التوا اسکیموں پر تشویش کا اظہار کرتے ہوئے تمام ایگزیکٹو ایجنسیوں کو سخت ہدایت دی کہ وہ تمام کام مقررہ وقت کے اندر مکمل کریں۔ انہوں نے معیار پر سمجھوتہ نہ کرنے اور مالی قواعد کی سختی سے پابندی کرنے کی تاکید کی۔ ڈی سی نے مزید کہا کہ محدود وسائل کے باوجود ہمارا مقصد کان کنی سے متاثرہ علاقوں کی ہمہ جہت ترقی ہے تاکہ ان اسکیموں کا فائدہ شفاف طریقے سے براہِ راست عام لوگوں اور ٹارگٹڈ کمیونٹی تک پہنچ سکے۔
