ریاست میں ترقیاتی کام ہوتے دیکھ بی جے پی گھبرا رہی ہے
جدید بھارت نیوز سروس
کوڈرما،10؍جولائی: جے ایم ایم کے راجیہ سبھا رکن ڈاکٹر سرفراز احمد جمعرات کو پٹنہ جاتے ہوئے کوڈرما سرکٹ ہاؤس پہنچے۔ اس دوران کانگریس کے پہلے ضلع صدر نرمل کمار اوجھا، نونیت اوجھا اور دیگر کانگریس اور جے ایم ایم کارکنوں نے گلدستے دے کر ان کا استقبال کیا۔ صحافیوں سے بات کرتے ہوئے انہوں نے کہا کہ وزیر اعلیٰ ہیمنت سورین کے دور میں ریاست میں جو ترقیاتی کام ہو رہے ہیں اسے دیکھ کر بی جے پی گھبرا رہی ہے۔ یہی وجہ ہے کہ بی جے پی سماج میں نفرت پھیلانا چاہتی ہے اور سماج کو تقسیم کرنے کی سازش کررہی ہے۔ اس لیے عوام کو ہوشیار اور محتاط رہنے کی ضرورت ہے۔ ڈاکٹر احمد نے کہا کہ ہیمنت حکومت کے دور میں سماج کا ہر طبقہ ترقی کر رہا ہے۔ انہوں نے کہا کہ اس طرح کی بہت سی اسکیمیں ہیں جن میں چیف منسٹر منیاں سمان یوجنا، ابوا آواس، ساوتری بائی پھولے سمان یوجنا شامل ہیں، جن کا فائدہ ہر طبقہ اور برادری کے لوگوں کو مل رہا ہے۔ اس کے ساتھ ساتھ نوجوانوں کو روزگار کے لیے قرضے بھی فراہم کیے جا رہے ہیں اور ساتھ ہی ساتھ نوجوانوں کو نوکریاں بھی دی جا رہی ہیں۔ انہوں نے کہا کہ جھارکھنڈ میں سڑکوں کا جال بچھا دیا گیا ہے، تعلیم اور صحت کے میدان میں بہتر کام ہو رہا ہے۔ ایک سوال کا جواب دیتے ہوئے انہوں نے کہا کہ بہار میں ہونے والے انتخابات میں مخلوط حکومت کا قیام یقینی ہے۔ یہی وجہ ہے کہ بی جے پی میں مایوسی ہے اور وہ الیکشن کمیشن کی مدد لے رہی ہے۔ بی جے پی بہار سے این آر سی شروع کرنے کی کوشش کر رہی ہے۔ مودی حکومت سماج کو تقسیم کرنے کا کام کر رہی ہے۔ اس دوران ضلع کوڈرما کے پہلے کانگریس ضلع صدر نرمل کمار اوجھا، نونیت اوجھا، سونو وارثی، نتن اوجھا وغیرہ نے ان سے ملاقات کی اور انہیں ضلع کے مسائل سے آگاہ کیا۔
