راج بھون کا گھیراؤ کریں گی بائیں بازو کی پارٹیاں
جدید بھارت نیوز سروس
رانچی،11؍جنوری: البرٹ ایککا چوک کے قریب واقع سی پی آئی ریاستی دفتر میں بائیں بازو کی جماعتوں سی پی آئی، سی پی ایم اور سی پی آئی (ایم ایل) کا مشترکہ اجلاس کامریڈ شبھیندو سین کی صدارت میں منعقد ہوا۔ اجلاس میں امریکی سامراج کی جانب سے تیل کی دولت ہڑپنے کے لیے وینزویلا پر کیے گئے حملے، بھارت سمیت کئی ممالک پر ‘ٹیرف دہشت گردی‘ مسلط کرنے اور مختلف طریقوں سے کی جانے والی بدمعاشی کے خلاف مہم تیز کرنے کا فیصلہ کیا گیا۔اس مہم میں جے ایم ایم، کانگریس، آر جے ڈی جیسی مختلف سیکولر جماعتوں کے ساتھ ساتھ مختلف سماجی تنظیموں اور دانشوروں کو بھی جوڑنے کا فیصلہ کیا گیا۔ مہم کے پہلے مرحلے میں 20 جنوری کو سینک بازار سے راج بھون تک احتجاجی مارچ نکالنے اور عوام کے درمیان پمفلٹ تقسیم کرنے کا فیصلہ کیا گیا۔ اس کی تیاری کے لیے ایک وسیع اجلاس 13 جنوری کو دوپہر 2 بجے سے سی پی آئی ریاستی دفتر میں ہوگا، جس میں مختلف سیاسی جماعتیں، سماجی تنظیمیں اور دانشور شرکت کریں گے۔آج کے اجلاس میں سی پی آئی سے اجے کمار سنگھ، سی پی ایم سے سمیر داس، سکھ ناتھ لوہرا، امل آزاد اور وریندر کمار، اور سی پی آئی (ایم ایل) سے شبھیندو سین، موہن دتا اور نندیتا بھٹاچاریہ شریک تھے۔
