مانگو کی ترقی پر تفصیلی تبادلہ خیال کرلیا آشیر واد
جدید بھارت نیوز سروس
نئی دہلی،رانچی،09؍ مارچ:مانگو نگر نگم کی نو منتخب میئر سدھا گپتا اور سابق وزیر بنّا گپتا نے آج نئی دہلی میں واقع کانگریس ہیڈ کوارٹر ‘اندرا بھون ‘ میں کانگریس کے جھارکھنڈ انچارج کے راجو جی سے خیر سگالی ملاقات کی۔ اس موقع پر انہوں نے مانگو نگر نگم انتخابات میں ملنے والی تاریخی جیت پر پارٹی قیادت کا شکریہ ادا کیا اور علاقے کی ترقی سے جڑے مختلف مسائل پر تفصیلی تبادلہ خیال کیا۔ ملاقات کے دوران سدھا گپتا نے کہا کہ مانگو کی عوام نے جس اعتماد اور حمایت کے ساتھ انہیں آشیرواد دیا ہے، اس بھروسے پر پورا اترنا ان کی اولین ترجیح ہے۔ انہوں نے میونسپل کارپوریشن کے علاقے میں صفائی ستھرائی، پینے کے پانی، سڑک، اسٹریٹ لائٹس اور صحت کی سہولیات کو بہتر بنانے کے لیے منصوبہ بند طریقے سے کام کرنے کے عزم کا اظہار کیا۔ سابق وزیر بنّا گپتا نے بھی پارٹی قیادت کو یقین دلایا کہ مانگو نگر نگم میں عوامی مفاد کے مسائل کو ترجیح دیتے ہوئے ترقیاتی کاموں کو تیز کیا جائے گا۔ انہوں نے کہا کہ کانگریس پارٹی ہمیشہ سے عوام کے مسائل کے حل اور علاقے کی ہمہ جہت ترقی کے لیے پرعزم رہی ہے۔ کانگریس کے جھارکھنڈ انچارج نے سدھا گپتا کو میئر کے عہدے پر جیت حاصل کرنے پر مبارکباد دی اور امید ظاہر کی کہ ان کی قیادت میں مانگو نگر نگم ترقی کی نئی منزلیں طے کرے گا۔ انہوں نے تنظیم کو مزید مضبوط بنانے اور عوام کے درمیان متحرک رہنے کی بھی تلقین کی۔اس موقع پر علاقائی سیاسی صورتحال اور آنے والے وقت میں تنظیم کو مضبوط کرنے کی حکمت عملی پر بھی تبادلہ خیال کیا گیا۔
