چکردھر پور ڈویژن کی کارکردگی پر سوال اٹھا ئے
جدید بھارت نیوز سروس
جمشیدپور،7؍اپریل: چکردھر پور ریلوے ڈویژن میں ٹرینوں کی تاخیر کے خلاف جمشید پور مغربی کے ایم ایل اے سریو رائے نے ٹاٹا نگر ریلوے کمپلیکس میں دھرنا دیا۔ ایم ایل اے سریو رائے نے کہا کہ آدھے گھنٹے کے سفر میں تین سے پانچ گھنٹے کا وقت لگتا ہے، جس کی وجہ سے عوام کو شدید پریشانی کا سامنا کرنا پڑ رہا ہے۔ انہوں نے کہا کہ احتجاج کا یہ پہلا مرحلہ ہے اور ہم اس مسئلے کو لے کر دہلی تک جائیں گے۔
ٹرینوں کی تاخیر سے پریشانی
جنوب مشرقی ریلوے کے چکردھر پور ریلوے ڈویژن کے تحت ٹاٹا نگر ریلوے اسٹیشن آتا ہے، لیکن ٹرینوں کی تاخیر کی وجہ سے سفر کرنے والے مسافروں کو گزشتہ کئی مہینوں سے یہاں مشکلات کا سامنا ہے۔ اب یہ پریشانی ایک بڑا مسئلہ بن گئی ہے، جسے لے کر جمشید پور مغربی سے جے ڈی یو کے ایم ایل اے سریو رائے نے تحریک کا آغاز کیا ہے۔
دھرنے پر سریو رائے
احتجاج کے پہلے مرحلے میں ایم ایل اے سریو رائے ٹاٹا نگر ریلوے اسٹیشن کے احاطے میں تپتی دھوپ میں دھرنے پر بیٹھے۔ دھرنے میں عام عوام کے ساتھ ساتھ مختلف تنظیموں کے علاوہ کولہان کی سب سے بڑی تجارتی تنظیم ‘سنگھ بھوم چیمبر آف کامرس اینڈ انڈسٹری کی حمایت بھی دیکھی گئی۔ ادھر دھرنے کے پیش نظر اسٹیشن کے احاطے میں آر پی ایف کی ٹیم اور باغ بیڑا تھانے کی پولیس بھاری تعداد میں موجود تھی۔
ریلوے کے طریقہ کار پر سوالات
ایم ایل اے سریو رائے نے کہا کہ ٹاٹا نگر اسٹیشن سے گزرنے والی اکثر مسافر ٹرینیں آئے دن تاخیر سے چل رہی ہیں، جس سے مسافروں کو شدید مشکلات درپیش ہیں۔ خاص طور پر ملازمت پیشہ افراد، طلباء اور مریضوں کو بروقت منزل تک نہ پہنچ پانے کی وجہ سے پریشانی کا سامنا کرنا پڑ رہا ہے۔انہوں نے ریلوے کے طریقہ کار پر سوال اٹھاتے ہوئے کہا کہ جیسے ہی ٹرینیں چکردھر پور ڈویژن میں داخل ہوتی ہیں، ان کی رفتار سست ہو جاتی ہے اور وہ لیٹ ہونے لگتی ہیں۔ انہوں نے الزام لگایا کہ چکردھر پور ڈویژن میں ٹرینوں کے آپریشن اور انتظام میں سنگین خامیاں ہیں، جنہیں جلد از جلد دور کرنے کی ضرورت ہے۔ یہاں کے رکن پارلیمنٹ نے بھی اس معاملے پر بات کی ہے لیکن کوئی فائدہ نظر نہیں آیا۔ اب یہ مسئلہ سیاسی نہیں ہے بلکہ عام عوام سے جڑا ہوا ہے، جسے لے کر وہ دہلی تک جائیں گے۔
سینئرڈی سی ایم کی ایم ایل اے سے ملاقات
اسی دوران چکردھر پور ریلوے ڈویژن کے سینیئر ڈی سی ایم (ڈویژنل کمرشل مینیجر) آدتیہ چودھری نے دھرنے پر بیٹھے سریو رائے سے ملاقات کی اور یقین دلایا کہ اس معاملے کو سنجیدگی سے دیکھا جا رہا ہے۔ انہوں نے کہا کہ کچھ تکنیکی خامیاں ہیں جنہیں دور کیا جائے گا تاکہ مسافر ٹرینیں مقررہ وقت پر چل سکیں۔
