جدید بھارت نیوز سروس
گملا ،31؍جولائی: ضلع گملا کے کارتک اوراون کالج کے آڈیٹوریم میں محکمہ زراعت حیوانات اور کوآپریٹیو کی طرف سے جنوبی چھوٹاگپور ڈویژن کی سطح پر زرعی آلات کی تقسیم کا ایک پروگرام منعقد کیا گیا۔ اس دوران 300 سے زائد پمپ سیٹ اور پچاس سے زائد ٹریکٹر تقسیم کئے گئے۔ اس پروگرام میں ریاست کی وزیر زراعت شلپی نیہا ترکی کے ساتھ کئی ایم ایل اے، ضلع ڈی سی پریرنا دکشٹ اور دیگر انتظامی افسران موجود تھے۔پروگرام میں بات کرتے ہوئے وزیر زراعت شلپی نیہا ترکی نے کہا کہ جب سے وہ وزیر زراعت بنی ہیں، وہ اس سمت میں نہایت خلوص کے ساتھ کام کر رہی ہیں۔ انہوں نے کہا کہ وہ نچلی سطح پر جاکر کسانوں میں اسکیموں کو خود تقسیم کررہی ہیں تاکہ اسکیموں کا فائدہ غلط ہاتھوں میں نہ جائے۔ انہوں نے یہ بھی کہا کہ وسائل کی تقسیم سے زراعت میں انقلاب آئے گا۔ انہوں نے یہ بھی کہا کہ گاؤں والوں کو اب زرعی کام کے ساتھ ساتھ مویشی پالنے اور دودھ کی پیداوار میں بھی شامل ہونے کی ضرورت ہے۔ کسانوں کو ہدایت دیتے ہوئے وزیر نے کہا کہ کسی کو بھی اسکیم کے فوائد حاصل کرنے کے لیے کوئی رقم ادا کرنے کی ضرورت نہیں ہے۔ انہوں نے محکمہ کے افسران کو متنبہ بھی کیا کہ اگر کوئی اہلکار استفادہ کرنے والے سے کچھ لے گا تو اسے برداشت نہیں کیا جائے گا۔اس پروگرام میں موجود ڈسٹرکٹ ڈی سی پریرنا دکشٹ نے کہا کہ یہ گملا ضلع کے لیے ایک تاریخی دن ہے جب کسانوں کو تکنیکی زراعت کے لیے وسائل مل رہے ہیں۔ انہوں نے کہا کہ گملا کی ایک بڑی آبادی زراعت کے کام سے وابستہ ہے اور جب کسانوں کو ایسے تکنیکی آلات ملیں گے تو اس کا براہ راست فائدہ زراعت کے کام کو ہوگا اور کسانوں کی معاشی حالت بہتر ہوگی۔اس کے ساتھ ہی اس اسکیم کا فائدہ اٹھانے کے لیے آنے والے کسانوں کا کہنا تھا کہ پہلے انہیں کھیتی باڑی کے کام میں مشکلات پیش آتی تھیں لیکن اب اس اسکیم کا فائدہ حاصل کرنے سے ان کی زندگی بہتر ہوگی اور زرعی پیداوار میں بھی اضافہ ہوگا۔ خواتین کا حوصلہ بڑھانے کے لیے وزیر زراعت شلپی نیہا ترکی نے خود ٹریکٹر چلایا اور گاؤں والوں کی حوصلہ افزائی کی۔ اس پروگرام میں گملا، سمڈیگا، لوہردگا، کھونٹی اور رانچی کے کئی کسان موجود تھے۔
وزیر شلپی نیہا ترکی نے کسانوں میں ،300 سے زیادہ پمپ سیٹ اور 50 سے زیادہ ٹریکٹر تقسیم کیے
