دینی و دنیاوی تعلیم حاصل کرنا ضروری
جدید بھارت نیوز سروس
رانچی، 22؍جنوری:جن کی آنکھیں نہیں ہیں ، جو دنیا نہیں دیکھ سکتےمولانا مشرف دینی تعلیم کو بڑھانے کا کام کر رہے ہیں ۔ہم لوگوں کے پاس آنکھیں ہیں لیکن پھر بھی ہم لوگ دین کا کام نہیں کر رہےہیں۔ یہ باتیں جھارکھنڈ حکومت کے وزیر حفیظ الحسن انصاری نے کہیں۔ وہ بدھ کو جامعہ عربیہ قاسم العلوم بیاسی، رانچی میں بطور مہمان خصوصی خطاب کر رہے تھے۔ انہوں نے کہا کہ میں ایک مہم شروع کر رہا ہوں کہ لوگ اپنے ولیمہ کے اخراجات کا 5 فیصد تعلیم پر لگائیں۔ اب وہ وقت ہے جب دینی اور دنیاوی دونوں طرح کی تعلیم حاصل کرنا ضروری ہے۔ وزیر موصوف نے فیتہ کاٹ کر حاجی حسین انصاری کی یاد میں جامعہ عربیہ قاسم العلوم بیاسی اور کمپیوٹر ٹریننگ سنٹر نیز لائبریری میں ایک روزہ سالانہ تقریب کا افتتاح کیا۔50 بستروں کا ہاسٹل فراہم کرنے کا بھی وعدہ کیا۔ مہمان خصوصی مولانا نسیم انور ندوی ڈائریکٹر فاطمہ گرلز اکیڈمی نے کہا کہ ایسی تنظیموں کو بڑھانے کی ضرورت ہے جو تعلیم پر کام کر رہی ہوں۔ جہاں تعلیم ہوگی وہاں اندھیرا نہیں ہوگا۔ اس موقع پر مدرسہ کے بانی مولانا مشرف جمال قاسمی نے خطاب کرتے ہوئے کہا کہ مدرسہ 21 سال سے دینی و دنیاوی تعلیم فراہم کر رہا ہے۔ اردو کے ساتھ ہندی، انگریزی، ریاضی، سائنس اور کمپیوٹر پڑھایا جاتا ہے۔ مولانا اصغر مصباحی نے کہا کہ آل انڈیا دینی تعلیم بورڈ جمعیۃ علماء ہند تعلیم پر کام کر رہا ہے۔ انہوں نے کہا کہ ڈاکٹر بنیں، انجینئر بنیں، اچھی تعلیم حاصل کریں لیکن دنیا کے ساتھ ساتھ دینی تعلیم بھی حاصل کریں۔ پروگرام کی صدارت مولانا مشرف جمال قاسمی نے کی اور نظامت مولانا رضوان دانش نے کی۔ بہتر کارکردگی دکھانے والے بچوں کو انعامات سے نوازا گیا۔ اسٹیج پر رانچی ضلع جے ایم ایم کے صدر مشتاق عالم، مولانا رمضان، مولانا الطاف، مولانا ارشد، ماسٹر جمیر الدین، مولانا گلزار، عبید اللہ عالم، محمد ارشاد انصاری، محمد اشفاق، محمد ارشاد، صدام انصاری اور دیگر موجود تھے۔
