دیہی ترقی کو سب سے زیادہ ترجیح؛ جب تک گاؤں مضبوط نہیں ہوگا، ریاست ترقی نہیں کرے گی: رادھاکرشن
جدید بھارت نیوز سروس
رانچی، 22 اگست:۔ رانچی میں جاری مون سون اجلاس کے دوران جھارکھنڈ کے وزیر خزانہ رادھا کرشنن کشور نے مالی سال 2025-26 کا پہلا ضمنی بجٹ جھارکھنڈ اسمبلی میں پیش کیا۔ حکومت کی جانب سے 4296 کروڑ 62 لاکھ روپے کی اضافی بجٹ کی تفصیلات ایوان کے سامنے رکھی گئیں۔ وزیر خزانہ نے کہا کہ یہ ایک آئینی عمل ہے، جس پر 25 اگست بروز پیر ایوان میں بحث کی جائے گی اور بعد ازاں منظوری دی جائے گی۔
دیہی ترقی کو اولین ترجیح
وزیر خزانہ نے بتایا کہ ضمنی بجٹ میں سب سے زیادہ رقم دیہی ترقیاتی محکمہ کے لیے مختص کی گئی ہے، جو 968.89 کروڑ روپے بنتی ہے۔ ان کا کہنا تھا کہ:’’میں مسلسل کہتا آیا ہوں کہ جھارکھنڈ کی 75 فیصد آبادی دیہی علاقوں میں رہتی ہے۔ جب تک گاؤں مضبوط نہیں ہوگا، تب تک ریاست کی معیشت اور سماج مضبوط نہیں ہو سکتے۔ اسی لیے اصل بجٹ ہو یا ضمنی، ہماری توجہ دیہی معیشت پر مرکوز ہے‘‘۔
مختلف شعبوں کو دی گئی بجٹ کی تقسیم
وزیر خزانہ کی پیش کردہ بجٹ تفصیل کے مطابق دیگر اہم شعبہ جات کے لیے درج ذیل رقوم مختص کی گئی ہیں:
- پانی و صفائی (پینے کے پانی اور سینیٹیشن): 417 کروڑ روپے
- پانچایتی راج محکمہ: 98.56 کروڑ
- تعلیم (اسکولی تعلیم و خواندگی): 420 کروڑ روپے
- خواتین، بچوں کی فلاح و سماجی تحفظ: 62.05 کروڑ روپے
- قانون و انصاف محکمہ: 29.62 کروڑ روپے
- اطلاعات و عوامی رابطہ محکمہ: 30.24 کروڑ روپے
- داخلہ، جیل اور آفات مینجمنٹ محکمہ: 79.15 کروڑ روپے
- صحت، طبی تعلیم و خاندانی بہبود: 448.63 کروڑ روپے
- وزارت خزانہ: 835.83 کروڑ
- کابینہ و الیکشن محکمہ: 202.43 کروڑ روپے
بجٹ پر بحث 25 اگست کو متوقع
وزیر خزانہ نے واضح کیا کہ یہ بجٹ ریاست کی ضروریات اور موجودہ مالی حالات کو مدنظر رکھتے ہوئے پیش کیا گیا ہے۔ ایوان میں اس بجٹ پر بحث پیر، 25 اگست کو ہوگی، جس کے بعد اس کی منظوری متوقع ہے۔
