بہار اسمبلی انتخاب نہ لڑنے کا جے ایم ایم نے کیا اعلان

کانگریس نے آر جے ڈی پر سیاسی سازش کا لگایا الزام

جدید بھارت نیوز سروس
رانچی، 21 اکتوبر:۔ جے ایم ایم کے رہنما اور کابینہ کے وزیر سدیبیہ کمار نے ایک پریس کانفرنس میں کہا کہ پارٹی نے یہ فیصلہ اپنے اتحادیوں، راشٹریہ جنتا دل (آر جے ڈی) اور کانگریس کی سیاسی سازش کی وجہ سے لیا ہے، کیونکہ اُسے گرینڈ الائنس کا حصہ ہونے کے باوجود نشستوں سے انکار کیا گیا تھا۔ وزیر نے پریس کانفرنس کی ویڈیو انسٹاگرام پر شیئر کی اور لکھا:”جھارکھنڈ مکتی مورچہ نے ہمیشہ اتحاد دھرم کے اپنے فرض کو پورا کیا ہے، تاہم، آنے والے بہار اسمبلی انتخابات میں جھارکھنڈ کے مفادات اور شعور کے ساتھ دھوکہ کیا گیا ہے، اور ہم، جھارکھنڈ کے لوگ، یہ نہیں بھولیں گے۔ ہم یہ واضح کرنا چاہتے ہیں کہ مورچہ ایک مضبوط اور مستحکم مورچہ ہے۔”انہوں نے مزید کہا کہ جھارکھنڈ کے لوگوں اور ملک کی قبائلی برادریوں کی آواز کو دبانے کی کوشش کی گئی ہے، جس کا جواب دیا جائے گا۔
جے ایم ایم جھارکھنڈ میں اتحاد کا جائزہ لے گی
جے ایم ایم کے سینئر لیڈر سدیبیہ کمار نے پریس کانفرنس میں کہا کہ ان کی پارٹی جھارکھنڈ میں کانگریس اور آر جے ڈی کے ساتھ اپنے اتحاد کا جائزہ لے گی اور اس “توہین” کا سخت جواب دے گی۔
ا سے قبل بہار الیکشن اکیلے لڑنے کا فیصلہ کیا تھا
ہیمنت سورین کی زیرقیادت جے ایم ایم نے دو دن قبل اعلان کیا تھا کہ وہ بہار کے انتخابات اکیلے لڑے گی اور چھ اسمبلی حلقوں میں امیدوار کھڑے کرے گی، کیونکہ گرینڈ الائنس کے اندر نشستوں کی تقسیم پر بات چیت ناکام ہو گئی تھی۔جے ایم ایم نے ہفتہ کو یہ اعلان کیا تھا کہ وہ چکائی، دھمدھا، کٹوریا، منیہاری، جموئی اور پیرپینتی نشستوں سے مقابلہ کرے گی، جہاں 11 نومبر کو دوسرے مرحلے کے لیے ووٹنگ ہونی ہے۔ ان نشستوں کے لیے نامزدگی داخل کرنے کی آخری تاریخ سوموار تھی۔
کانگریس اور آر جے ڈی کو مناسب جواب دیا جائے گا
جھارکھنڈ کے وزیر سیاحت سدیبیہ کمار نے کہا:”سیاسی سازش کے تحت جے ایم ایم کو الیکشن لڑنے کے حق سے محروم کرنے کے لیے آر جے ڈی اور کانگریس ذمہ دار ہیں۔ جے ایم ایم مناسب جواب دے گی اور آر جے ڈی و کانگریس کے ساتھ اپنے اتحاد کا جائزہ لے گی۔”