جدید بھارت نیوز سروس
سویڈن، 28 اپریل: جھارکھنڈ حکومت کے ایک اعلیٰ سطحی وفد جس میں وزیر اعلیٰ ہیمنت سورین اور ان کی اہلیہ اور رکن اسمبلی کلپنا سورین شامل ہیں، نے سویڈن میں واقع عالمی شہرت یافتہ IVL Swedish Environmental Research Institute کے صدر دفتر کا دورہ کیا، جہاں دونوں فریقین کے درمیان ماحول دوست ٹیکنالوجیز، پائیدار ترقی، اور جدید ماحولیاتی حلوں پر باہمی تعاون کے امکانات پر تفصیلی بات چیت ہوئی۔اس اجلاس میں ریاست کے سینئر افسران اور سیکریٹریز شامل تھے، جبکہ IVL کی جانب سے ادارے کے سی ای او جان رونے نیلسن، چیف فنانشل آفیسر، انٹرنیشنل پراجیکٹس کے سربراہ، اور IVL انڈیا ریسرچ اینڈ ڈیولپمنٹ یونٹ کے سی ای او نے شرکت کی۔
پانی، ویسٹ مینجمنٹ اور ماحولیاتی ٹیکنالوجی پر تبادلہ خیال
بات چیت کے دوران پانی اور فضلہ کی مؤثر منیجمنٹ، ماحولیاتی تحفظ، ای-موبلٹی (برقی نقل و حمل)، اور ویسٹ ٹو انرجی جیسے اہم شعبہ جات پر توجہ مرکوز کی گئی۔ دونوں فریقوں نے ان موضوعات پر مشترکہ منصوبہ بندی اور تکنیکی تعاون کے امکانات کا جائزہ لیا، جو نہ صرف جھارکھنڈ بلکہ پورے خطے کے لیے ماحول دوست پالیسیوں کو فروغ دے سکتے ہیں۔
وزیر اعلیٰ ہیمنت سورین نے اجلاس کے بعد اپنے سرکاری ٹویٹر اکاؤنٹ پر لکھا:
’IVL کے ساتھ یہ ملاقات جھارکھنڈ کے ماحولیاتی وژن کو عالمی معیار کی ٹیکنالوجی سے جوڑنے کی جانب ایک اہم قدم ہے۔ پانی و فضلہ مینجمنٹ، اور کلین انرجی جیسے موضوعات پر اس اشتراک سے ریاست میں پائیدار ترقی کو تقویت ملے گی‘۔
یہ دورہ جھارکھنڈ کی حکومت کے اس وژن کی عکاسی کرتا ہے جس کے تحت وہ عالمی اداروں کے ساتھ مل کر ریاست میں جدید ٹیکنالوجی، سرمایہ کاری اور پائیدار ماحولیاتی اقدامات کے لیے نئے راستے کھول رہی ہے۔
جھارکھنڈ حکومت اور سویڈش ماحولیاتی ادارے کے درمیان پانی، ویسٹ مینجمنٹ اور ماحولیاتی ٹیکنالوجی میں تعاون پر تبادلہ خیال
