آج سے ہوم گارڈ س کی ہوگی بحالی

ڈی سی کریتی شری نے اسٹیڈیم میں انتظامات کا جائزہ لیا

جدید بھارت نیوز سروس
چترا،31؍مارچ: ضلع میں یکم اپریل سے شروع ہونے والی ہوم گارڈ کی بحالی کے حوالے سے انتظامی سرگرمیاں اب اپنے آخری مراحل میں پہنچ چکی ہیں۔ اسی سلسلے میں ڈی سی کریتی شری جی نے جواہر لعل نہرو اسٹیڈیم کا معائنہ کر کے تمام تیاریوں کا تفصیلی جائزہ لیا۔ معائنے کے دوران ڈی سی نے تعینات مجسٹریٹس اور متعلقہ محکمانہ افسران کو کئی ضروری ہدایات دیں۔ انہوں نے کہا کہ پوری بحالی کا عمل شفاف، محفوظ، منظم اور مقررہ وقت پر مکمل ہو، یہ ضلع انتظامیہ کی اولین ترجیح ہے۔ ڈی سی نے امیدواروں کی سہولیات جیسے کہ پینے کا پانی، طبی امداد، آرام گاہ، حفاظتی انتظامات اور بھیڑ کے انتظام پر خصوصی توجہ دینے کی ہدایت دی۔ انہوں نے افسران سے کہا کہ کسی بھی ممکنہ بدانتظامی کو روکنے کے لیے ہر مرحلے کا ٹرائل رن لازمی طور پر کیا جائے۔ڈی سی نے یہ بھی واضح کیا کہ تال میل کی کمی سے کام متاثر نہ ہو، اس لیے تمام محکمے مقررہ وقت کے اندر اپنی تیاریاں مکمل کریں۔ ضلع انتظامیہ کی جانب سے اس بات کو یقینی بنایا جا رہا ہے کہ بحالی کا عمل غیر جانبدارانہ، پرامن اور کسی بھی رکاوٹ کے بغیر مکمل ہو۔ اس دوران ایڈیشنل کلکٹر اروند کمار، ڈی آر ڈی اے ڈائریکٹر الکا کماری، ایس ڈی ایم چترا محمد ظہور عالم، ڈی ایس پی ہیڈ کوارٹر امیتا لکڑا، ایس ڈی پی او سندیپ سمن، متعلقہ بلاکوں کے بی ڈی اوز اور سی اوز سمیت کئی دیگر افسران اور پولیس اہلکار موجود تھے۔