آسام میں جے ایم ایم کی جارحانہ انتخابی مہم، بی جے پی پر سخت حملہ
جدید بھارت نیوز سروس
آسام، 3 اپریل: آسام اسمبلی انتخابات کے پیش نظر جھارکھنڈ مکتی مورچہ (جے ایم ایم) نے اپنی موجودگی کو جارحانہ انداز میں درج کرانا شروع کر دیا ہے۔ بورچلّا اسمبلی حلقہ میں ایک بڑی عوامی ریلی سے خطاب کرتے ہوئے جھارکھنڈ کے وزیر اعلیٰ ہیمنت سورین نے بھارتیہ جنتا پارٹی کو سخت تنقید کا نشانہ بنایا۔
بی جے پی پر سخت تنقید
ہیمنت سورین نے کہا کہ نریندر مودی کی قیادت والی بھارتیہ جنتا پارٹی حکومت اقتدار میں آنے کے بعد سے این آر سی اور سی اے اے جیسے معاملات کو لا کر سماج کو تقسیم کرنے کی کوشش کر رہی ہے۔ انہوں نے الزام لگایا کہ بی جے پی کی سیاست “تقسیم کرو اور حکومت کرو” کے اصول پر مبنی ہے، جس سے ملک کی یکجہتی اور سماجی ہم آہنگی متاثر ہو رہی ہے۔
انتخابات کو حقوق کی لڑائی قرار
انہوں نے اس انتخاب کو آدیواسیوں، دلتوں اور پسماندہ طبقات کے حقوق کی لڑائی قرار دیتے ہوئے کہا کہ جس طرح جھارکھنڈ میں تبدیلی ممکن ہوئی، اسی طرح آسام میں بھی ایک نئی سیاسی تبدیلی لائی جا سکتی ہے۔
نوٹ بندی اور کورونا پر تنقید
وزیر اعلیٰ نے نوٹ بندی اور COVID-19 کے دور کا حوالہ دیتے ہوئے کہا کہ عام لوگوں کو بار بار قطاروں میں کھڑا ہو کر مشکلات کا سامنا کرنا پڑا، اور آج بھی عوام بنیادی ضروریات کے لیے جدوجہد کر رہی ہے۔
خواتین کو مالی امداد پر سوال
ہیمنت سورین نے انتخابی دوران خواتین کے بینک کھاتوں میں مالی امداد منتقل کرنے کے عمل پر سوال اٹھاتے ہوئے کہا کہ صرف چند ہزار روپے دینا کافی نہیں ہے۔ انہوں نے کہا کہ اگر حکومت سنجیدہ ہے تو خواتین کو مستقل بنیادوں پر ماہانہ مالی مدد فراہم کی جانی چاہیے۔
جے ایم ایم کی پہلی باضابطہ انٹری
انہوں نے کہا کہ پہلی بار جھارکھنڈ مکتی مورچہ آسام میں باضابطہ طور پر انتخابی میدان میں اتری ہے اور “تیر و کمان” انتخابی نشان کے ساتھ عوام کے درمیان مضبوط دعویداری پیش کر رہی ہے۔ انہوں نے شیبو سورین کے دور سے آسام کے عوام کے ساتھ پارٹی کے تعلقات کا بھی ذکر کیا۔
آسام کی صورتحال پر تشویش
ہیمنت سورین نے آسام کے چائے باغانوں کا دورہ کرنے کا حوالہ دیتے ہوئے کہا کہ وہاں مزدوروں اور آدیواسی سماج کی حالت نہایت تشویشناک ہے۔ انہوں نے کہا کہ جہاں ملک میں ترقی کے دعوے کیے جا رہے ہیں، وہیں آسام کے کئی علاقوں میں آج بھی بجلی، پانی اور پختہ مکانات جیسی بنیادی سہولیات میسر نہیں ہیں۔
چائے باغان مزدوروں کے مسائل
انہوں نے مزید کہا کہ آسام کی معیشت بڑی حد تک چائے باغانوں پر منحصر ہے، لیکن وہاں کام کرنے والے مزدوروں کو اب تک مناسب اور باعزت اجرت نہیں مل رہی، جو حکومتی ناکامی کو ظاہر کرتا ہے۔
عوام سے براہ راست اپیل
اپنی تقریر کے اختتام پر وزیر اعلیٰ نے عوام سے اپیل کی کہ وہ ای وی ایم میں چوتھا بٹن دبا کر جے ایم ایم کے امیدوار عبدالمجان کو بھاری اکثریت سے کامیاب بنائیں۔
لکھیم پور میں بھی انتخابی ریلی
اس سے قبل ہیمنت سورین نے آسام کے لکھیم پور ضلع کے روگونادی اسمبلی حلقہ میں واقع ڈیجو ٹی اسٹیٹ میدان میں بھی ایک بڑی عوامی ریلی سے خطاب کیا اور اپنے امیدوار کے حق میں ووٹ دینے کی اپیل کی۔
