پوسٹ مارٹم کے لیے بھیجے گئے تینوں جاں بحق افراد کے جسدِ خاکی
جدید بھارت نیوز سروس
ہزار ی باغ، 14 جنوری :۔شہر کے حبیبی نگر علاقے میں پیش آئے دھماکہ خیز واقعہ میں تین افراد کی موت کے بعد پولیس انتظامیہ الرٹ ہو گئی ہے۔ واقعہ کے 20 گھنٹے سے زائد وقت گزرنے کے بعد موقعٔ واردات سے دو لاشیں اٹھا کر شیخ بھیکھاری میڈیکل کالج ہسپتال پوسٹ مارٹم کے لیے بھیجی گئیں، جبکہ تیسری لاش پہلے ہی پوسٹ مارٹم ہاؤس میں محفوظ رکھی گئی تھی۔ ڈاکٹروں کی ٹیم کے ذریعے پوسٹ مارٹم کیا جائے گا، تاکہ یہ معلوم ہو سکے کہ کس قسم کے دھماکہ خیز مادے کے باعث اموات ہوئیں۔پولیس نے لاشیں پوسٹ مارٹم کے لیے بھیجنے کے بعد بھی واقعہ کے مقام کی باریک بینی سے جانچ کی اور جائے وقوعہ سے ذرات کے نمونے جمع کیے۔ معلومات کے مطابق میاں بیوی صفائی کے دوران جھاڑی میں پڑا ایک بند ڈبہ ملا تھا۔ ڈبہ نہ کھلنے پر مرد نے اسے ایک چھوٹی باؤنڈری پر رکھ کر کلہاڑی سے مارا، اسی دوران اس کی بیوی اور ایک اور خاتون قریب کھڑی تھیں اور ایک چھوٹی گائے بھی وہیں چر رہی تھی۔ کلہاڑی پڑتے ہی زور دار دھماکہ ہوا، جس میں مرد اور دوسری خاتون موقع پر ہی ہلاک ہو گئیں، جبکہ بیوی نے ہسپتال لے جاتے وقت دم توڑ دیا۔دھماکے کے دوران ڈبے کا ایک حصہ قریب چر رہی گائے کے پیٹ میں پیوست ہو گیا، جس سے اسے شدید خون بہنے لگا۔ گائے کو پولیس گاڑی کے ذریعے مویشی ہسپتال پہنچایا گیا۔ بتایا جا رہا ہے کہ ڈبے میں تقریباً ایک سے ڈیڑھ کلو گرام دھماکہ خیز مواد موجود تھا۔ پولیس معاملے کی جانچ میں مصروف ہے۔
