گھاٹ شلہ اسمبلی ضمنی انتخاب آج؛ تیاریاں مکمل

2.56 لاکھ ووٹر 13 امیدواروں کی قسمت کا فیصلہ کریں گے

رانچی، 10 اکتوبر:۔ [جدید بھارت نیوز سروس]گھاٹ شلہ اسمبلی ضمنی انتخاب کے لیے تمام انتظامی تیاریاں مکمل کر لی گئی ہیں۔ کل 11 نومبر کو گھاٹ شلہ کے عوام الیکشن لڑنے والے 13 امیدواروں کی قسمت کا فیصلہ کریں گے۔ ووٹنگ صبح 7 بجے سے شام 5 بجے تک ہوگی۔ الیکشن کمیشن کی جانب سے قائم کیے گئے 300 پولنگ اسٹیشنوں پر 2,56,352 ووٹرز اپنا حقِ رائے دہی استعمال کریں گے۔گھاٹ شلہ اسمبلی ضمنی انتخاب میں مرد ووٹروں کے مقابلے خواتین ووٹروں کی تعداد زیادہ ہے۔ الیکشن کمیشن کے اعداد و شمار کے مطابق، اس حلقے میں مرد ووٹروں کی تعداد 1,25,114 جب کہ خواتین ووٹروں کی تعداد 1,31,235 ہے۔ PWD ووٹروں کی تعداد 2,738 ہے اور تین ٹرانس جینڈر ووٹرز بھی ہیں۔الیکشن کمیشن نے اس ضمنی انتخاب کے لیے 231 مقامات پر 300 پولنگ اسٹیشن قائم کیے ہیں۔ پرامن اور منصفانہ انتخابات کے لیے وسیع انتظامات کیے گئے ہیں۔ چیف الیکٹورل آفیسر کیروی کمار کے مطابق، تمام بوتھوں سے ویب کاسٹنگ کی جائے گی، جس کے لیے پولنگ اسٹیشنوں کے اندر اور باہر کیمرے نصب کیے گئے ہیں۔الیکشن کمیشن آف انڈیا، چیف الیکٹورل افسر کے دفتر اور ضلعی سطح پر ووٹنگ کی نگرانی ویب کاسٹنگ کے ذریعے کی جائے گی۔ انہوں نے کہا کہ پرامن انتخابات کو یقینی بنانے کے لیے مرکزی فورسز کے ساتھ ریاستی پولیس بھی تعینات کی گئی ہے۔ مزید کہا کہ یہ علاقہ پہلے نکسل ازم سے متاثر رہا ہے، فی الحال کوئی خاص مسئلہ نہیں ہے، تاہم کسی بھی ممکنہ پریشانی سے نمٹنے کے لیے سیکیورٹی کو مضبوط کیا گیا ہے۔پڑوسی ریاستوں اوڈیشہ اور مغربی بنگال کے ساتھ سرحدیں سیل کر دی گئی ہیں۔