گڑھوا: نگر اونٹاری میں فائرنگ کا معاملہ

نوجوان اور اس کی مبینہ معشوقہ نے مل کر رچی تھی جان لیوا حملے کی سازش

جدید بھارت نیوز سروس
گڑھوا،29؍مارچ : ضلع کے نگر اونٹاری تھانہ علاقہ کے نرکھوریا کلاں گاؤں میں 28 مارچ 2026 کو فائرنگ کا واقعہ پیش آیا تھا، جہاں 51 سالہ امیش مہتا کو مجرموں نے گولی مار کر شدید زخمی کر دیا تھا۔ زخمی کو فوری طور پر اسپتال میں داخل کرایا گیا جہاں ان کا علاج جاری ہے۔ واقعے کے بعد پولیس نے مستعدی دکھاتے ہوئے معاملہ درج کر کے تحقیقات شروع کر دی تھی۔ اس سلسلے میں تھانہ کانڈ نمبر 65/26 کے تحت مختلف دفعات میں ایف آئی آر درج کی گئی ہے۔
ایس آئی ٹی (SIT) کی تشکیل اور چھاپہ ماری
اطلاع ملتے ہی سب ڈویژنل پولیس آفیسر کی ہدایت پر ایک خصوصی ٹیم تشکیل دے کر مجرموں کی تلاش شروع کی گئی۔ تفتیش کے دوران پولیس کو خفیہ اطلاع ملی، جس کی بنیاد پر تعاقب کرتے ہوئے ایک مشتبہ نوجوان کو بینگاسی گاؤں کے پاس سے گرفتار کر لیا گیا۔ پوچھ گچھ میں اس نے اپنا نام 26 سالہ سندیپ کمار سنگھ بتایا۔ تلاشی کے دوران اس کے پاس سے ایک دیسی کٹا، ایک زندہ کارتوس اور ایک کھوکھا برآمد ہوا ہے۔
ملزم سندیپ کمار سنگھ کا ایک لڑکی کے ساتھ 2021 سے معاشقہ تھا۔ اسی دوران لڑکی کی شادی امیش مہتا کے بیٹے سے طے پا گئی۔ شادی سے ناراض ہو کر ملزم اور لڑکی نے مل کر سازش رچی کہ لڑکے یا اس کے گھر والوں کو نقصان پہنچایا جائے تاکہ شادی ٹوٹ جائے۔ منصوبے کے تحت ملزم 27 مارچ کی رات بوکارو سے گڑھوا پہنچا اور ایک ہوٹل میں ٹھہرا۔ اگلے دن لڑکی سے ملنے والی معلومات کی بنیاد پر وہ موقع پر پہنچا اور امیش مہتا کی دکان پر سگریٹ مانگنے کے بہانے گولی چلا دی۔اس معاملے میں مرکزی ملزم سندیپ کمار سنگھ کے ساتھ گڑھوا کی ہی 24 سالہ رجنی مہتا کو بھی پولیس نے گرفتار کر لیا ہے۔ دونوں سے پوچھ گچھ جاری ہے اور معاملے میں مزید کارروائی کی جا رہی ہے۔ پولیس نے واقعے میں استعمال ہونے والااسلحہ بھی برآمد کر لیا ہے۔ پولیس نے پریس کانفرنس کے ذریعے پورے معاملے کا انکشاف کیا۔