’مڈ ڈے میل‘ کے کھانے سے بچوں میں فوڈ پوائزننگ

6 سالہ بچی کی موت، 20 دیگر بچے بیمار

جدید بھارت نیوز سروس
چائباسہ، 29 مارچ:۔ مغربی سنگھ بھوم ضلع کے جگناتھ پور اسمبلی حلقہ کے جیٹیا پنچایت کے نیاگاؤں میں اسکولی بچوں کو دوپہر کا کھانا کھانے کے بعد فوڈ پوائزننگ کا سامنا کرنا پڑا۔ اس واقعے میں 6 سالہ آیوشی گوپ کی موت ہو گئی ہے۔ بتایا جارہا ہے کہ بچوں نے پرائمری اسکول نیاگاؤں اوڈیا اسکول میں تیار کیا ہوا دال چاول اور آلو کا سالن کھایا تھا۔ کھانا کھانے کے کچھ دیر بعد بچوں کو الٹیاں اور اسہال ہونے لگا۔ صورتحال کی سنگینی کو دیکھتے ہوئے سات بچوں کو جگن ناتھ پور کمیونٹی ہیلتھ سنٹر میں داخل کرایا گیا۔ یہاں ڈاکٹر برج موہن ہیسا کی نگرانی میں بچوں کا علاج کیا جا رہا ہے اور سب کو سیلائن دیا جا رہا ہے۔ بچے کی حالت تشویشناک ہونے پر اسے چائی باسہ صدر ہسپتال ریفر کر دیا گیا۔ چمپوا کے نجی ہسپتال میں بھی کچھ بچے داخل ہیں۔ مقامی ذرائع کے مطابق 20 کے قریب بچے اس فوڈ پوائزننگ کا شکار ہو چکے ہیں۔ محکمہ صحت کی ٹیم معاملے کی جانچ میں مصروف ہے۔