ہسپتال 6 لاکھ معاوضہ پیش کیا
جدید بھارت نیوز سروس
بوکارو، 3 اپریل:۔ بوکارو ضلع کے چاس میں تیلیڈیہ روڈ پر واقع امرت ملٹی اسپیشلٹی ہسپتال میں جمعہ کو ایک خاتون مریضہ کی علاج کے دوران موت ہوگئی۔ گھر والوں نے زبردست ہنگامہ کھڑا کر دیا۔ متوفی خاتون پاروتی دیوی (55) نارائن پور پنچایت کے بارد ٹنڈ کے رہنے والے پردیپ شرما کی بیوی تھی۔ جمعہ کو ہسٹریکٹومی کے دوران اس کی موت ہو گئی۔لواحقین کے مطابق آپریشن سے قبل ڈاکٹر کی ہدایت کے مطابق تمام ضروری ٹیسٹ کرائے گئے تھے اور تمام رپورٹس نارمل تھیں۔ اس کا آپریشن جمعہ کی صبح تقریباً 7 بجے ڈاکٹر شبھرا ورما کی نگرانی میں شروع ہوا، اس دوران اس کی حالت بگڑ گئی اور اس کے کچھ ہی دیر بعد اس کی موت ہوگئی۔متوفی خاتون کے بیٹے نے بتایا کہ ابتدائی طور پر آپریشن کے دوران سب کچھ نارمل ہونے کی اطلاع تھی تاہم تقریباً ایک گھنٹے بعد آپریشن تھیٹر میں افراتفری مچ گئی۔ بیٹے نے الزام لگایا کہ ہسپتال میں آکسیجن سلنڈر کی کمی ہے جس کی وجہ سے اس کی ماں کی موت واقع ہوئی۔ تاہم ڈاکٹروں نے موت کی وجہ دل کا دورہ بتایا ہے۔ اطلاع ملتے ہی چاس تھانہ انچارج سشما کماری اپنی ٹیم کے ساتھ ہسپتال پہنچی اور معاملے کے بارے میں دریافت کیا۔ پولیس نے اہل خانہ کو سمجھا کر تسلی دی۔ ہسپتال انتظامیہ نے متوفی کے اہل خانہ کو ان کے طبی اخراجات کی ادائیگی کی اور انہیں 6 لاکھ روپے کا معاوضہ فراہم کیا۔ اس کے بعد اہل خانہ لاش کو آخری رسومات کے لیے گھر لے گئے۔
