جدید بھارت نیوز سروس
کھونٹی ،19؍فروری:نکسل مخالف مہم میں کھونٹی پولیس کو بڑی کامیابی ملی ہے۔ ممنوعہ نکسلی تنظیم پی ایل ایف آئی (PLFI) کے نام پر لیوی کی وصولی، غیر قانونی اسلحہ رکھنے اور مجرمانہ واقعات کو انجام دینے والے نامزد ملزم عظیم حواری عرف محمد عظیم حباری عرف ہمانشو کو پولیس نے گرفتار کر لیا ہے۔پولیس کے مطابق، ملزم کے خلاف کھونٹی تھانہ میں کیس نمبر 142/25 (مؤرخہ 06 جولائی 2025) درج ہے، جس میں بی این ایس (BNS) کی سنگین دفعات کے ساتھ ساتھ آرمز ایکٹ اور سی ایل اے ایکٹ کے تحت مقدمہ درج کیا گیا تھا۔ گرفتار ملزم کی عمر تقریباً 36 سال بتائی جا رہی ہے اور وہ کھونٹی شہر کا ہی رہائشی ہے۔پولیس کی تفتیش میں یہ بات بھی سامنے آئی ہے کہ ملزم ماضی میں پی ایل ایف آئی تنظیم سے سرگرم طور پر وابستہ تھا۔ بعد کے سالوں میں اس نے الگ گروہ بنا کر اسلحہ کے زور پر بھتہ خوری، لوٹ مار اور دہشت پھیلانے کے واقعات کو انجام دینا شروع کر دیا تھا۔ پولیس کو خفیہ اطلاع ملی تھی کہ پی ایل ایف آئی کے نام پر علاقے میں لیوی وصول کی جا رہی ہے اور ناجائز ہتھیاروں کی خرید و فروخت کا نیٹ ورک سرگرم ہے۔ اطلاع کی تصدیق کے بعد پولیس نے فوری کارروائی کرتے ہوئے چھاپہ مارا اور ملزم کو اس کے گھر سے گرفتار کر لیا۔پوچھ گچھ کے دوران ملزم نے اعتراف کیا ہے کہ وہ ہتھیاروں اور گولیوں کو کپڑوں میں چھپا کر بیچتا تھا اور تنظیم کے نام پر تاجروں اور عام لوگوں سے بھتہ مانگتا تھا۔ اس کا بنیادی مقصد علاقے میں خوف کا ماحول پیدا کر کے غیر قانونی وصولی کرنا تھا۔ایس ڈی پی او (SDPO) ورون رجک نے پریس کانفرنس میں بتایا کہ گرفتار ملزم کی مجرمانہ تاریخ رہی ہے۔ اس کے خلاف پہلے سے کئی سنگین مقدمات درج ہیں، جن میں لیوی کی وصولی، لوٹ مار، ناجائز اسلحہ رکھنا اور فائرنگ جیسے واقعات شامل ہیں۔ پولیس اب یہ پتہ لگانے میں مصروف ہے کہ اس کے گروہ میں اور کون کون لوگ شامل ہیں، ہتھیاروں کی سپلائی کہاں سے ہوتی تھی اور اب تک کتنے لوگوں کو ہتھیار بیچے گئے ہیں۔اس کارروائی میں تھانہ انچارج، تفتیشی افسر سمیت کھونٹی تھانہ کے کئی پولیس افسران اور مسلح فورس کے جوان شامل تھے۔ پولیس انتظامیہ نے واضح کیا ہے کہ ضلع میں ممنوعہ تنظیموں اور مجرمانہ گروہوں کے خلاف سخت مہم آئندہ بھی جاری رہے گی اور امن و امان سے کھلواڑ کرنے والوں کو کسی بھی صورت میں بخشا نہیں جائے گا۔
کھونٹی : پی ایل ایف آئی کے نام پر بھتہ وصولنے والاگرفتار
