بچوں کی پھٹی کاپی دیکھ فوری امداد کی ہدایت
جدید بھارت نیوز سروس
بوکارو، 13 فروری:۔ ضلع کے بیرمو بلاک کے ایک پرائمری اسکول میں اس وقت جذباتی منظر دیکھنے کو ملا جب ڈپٹی کمشنر اجے ناتھ جھا پولنگ مراکز کے معائنہ کے سلسلہ میں اچانک اسکول پہنچ گئے۔ معائنہ کے دوران ان کی نظر ایک کمسن طالب علم سورج کی کاپی پر پڑی جس کے کئی صفحات پھٹے ہوئے تھے۔ ڈپٹی کمشنر نے شفقت سے دریافت کیا کہ تمہاری کاپی کیوں پھٹی ہے؟ اس سوال پر سورج کچھ دیر خاموش رہا اور پھر معصومیت سے بولا کہ سر، میری کاپی کو چوہوں نے کھا لیا ہے۔
اس سادہ جواب نے وہاں موجود سبھی افراد کو متاثر کر دیا۔ اس کے بعد ڈپٹی کمشنر نے فوری طور پر تمام بچوں کے لیے نئی کاپیاں اور اسکول بیگ فراہم کرنے کی ہدایت دی تاکہ ان کی پڑھائی میں کوئی رکاوٹ نہ آئے۔ انہوں نے اعتراف کیا کہ اس واقعہ نے انہیں اندر سے بے چین کر دیا ہے۔ڈپٹی کمشنر نے بتایا کہ اسکول میں 18 بچوں کا اندراج ہے، جن میں سے اس دن تقریباً 10 بچے موجود تھے اور تعلیم حاصل کر رہے تھے۔ انہوں نے بچوں سے گفتگو کی اور ان کی تحریر دیکھی۔ ایک بچے کی لکھائی نہایت اچھی تھی لیکن اس کی کاپی پھٹی ہوئی تھی۔ صورتحال کو سمجھتے ہوئے فوری طور پر کاپیاں منگوائی گئیں اور تمام بچوں کو کاپیاں اور بیگ فراہم کیے گئے تاکہ وہ اپنی تعلیمی اشیاء کو محفوظ رکھ سکیں۔ انہوں نے کہا کہ یہ واقعہ اس بات کا احساس دلاتا ہے کہ ابھی ہمیں طویل سفر طے کرنا ہے۔اجے ناتھ جھا نے کہا کہ دیہی علاقوں میں بے شمار باصلاحیت بچے موجود ہیں جنہیں آگے بڑھانے کے لیے سنجیدہ کوششوں کی ضرورت ہے۔ انہوں نے اساتذہ کو تلقین کی کہ بچوں کے ساتھ شائستگی سے پیش آئیں، ان کے مسائل کو سمجھیں اور ایسا ماحول بنائیں کہ بچے بے جھجھک اپنی بات رکھ سکیں۔ انہوں نے کہا کہ جب ہم عوام کی خدمت کے لیے سرکاری تنخواہ لیتے ہیں تو کیا ہم ان بچوں کو کاپی کتاب فراہم نہیں کر سکتے۔
