مریضوں کے مکمل علاج اور بیداری مہم کو تیز کرنے کی ہدایت
’ نکشےپوشن یوجنا ‘کا صد فیصد فائدہ پہنچانے اور پنچایتوں کو ٹی بی سے پاک بنانے پر زور
جدید بھارت نیوز سروس
چترا،6؍مارچ: چترا کلکٹریٹ کے میٹنگ ہال میں ڈپٹی کمشنر کریتی شری جی کی صدارت میں محکمہ صحت کی ٹی بی فورم اور کو-موربیڈیٹی کمیٹی کا ایک اہم اجلاس منعقد ہوا۔ اجلاس میں ضلع میں ٹی بی کے خاتمے کے لیے چلائے جا رہے پروگراموں کا گہرائی سے جائزہ لیا گیا اور مریضوں کے مناسب علاج، جانچ کے نظام اور بیداری مہم کو مزید موثر بنانے پر زور دیا گیا۔ اجلاس کے دوران ڈپٹی کمشنر نے محکمہ صحت کے افسران کو ہدایات دیتے ہوئے کہا کہ ٹی بی کے مریضوں کی بروقت شناخت اور علاج کو یقینی بنانا انتہائی ضروری ہے۔ اس کے لیے ضلع میں جانچ کی تعداد بڑھائی جائے اور مشتبہ مریضوں کی فوری جانچ کر کے انہیں علاج سے جوڑا جائے۔ انہوں نے کہا کہ ٹی بی کے علاج میں سب سے اہم مریضوں کی جانب سے دوا کا مکمل کورس کرنا ہے، اس لیے متعلقہ افسران مریضوں کی باقاعدہ نگرانی کریں اور اس بات کو یقینی بنائیں کہ کوئی بھی مریض درمیان میں علاج نہ چھوڑے۔ڈپٹی کمشنر نے کہا کہ حکومت کی جانب سے چلائی جا رہی ‘نکشےپوشن یوجنا‘ کا فائدہ تمام ٹی بی مریضوں تک پہنچنا چاہیے۔ اسکیم کے تحت مریضوں کو علاج کے دوران خوراک کے لیے ماہانہ ایک ہزار روپے کی رقم براہ راست ان کے بینک کھاتوں میں بھیجی جاتی ہے۔ انہوں نے افسران کو ہدایت دی کہ ضلع کے تمام اہل مریضوں کو اس اسکیم کا صد فیصد فائدہ یقینی بنایا جائے۔ اس کے علاوہ ڈی سی نے زیر علاج تمام مریضوں کو ‘نیوٹریشن باسکٹ ‘فراہم کرنے پر بھی زور دیا۔ انہوں نے کہا کہ غذائی خوراک ٹی بی کے مریضوں کی جلد صحت یابی میں اہم کردار ادا کرتی ہے، اس لیے غذائیت سے متعلق امداد بروقت فراہم کی جائے۔ ساتھ ہی انہوں نے اسکولوں، پنچایتوں اور عوامی مقامات پر بڑے پیمانے پر بیداری مہم چلانے کی ہدایت دی، تاکہ لوگ ٹی بی کی علامات، جانچ اور علاج کے تئیں باخبر ہو سکیں۔اجلاس میں یہ ہدایت بھی دی گئی کہ ٹی بی کے تمام مریضوں کی ایچ آئی وی اور ذیابیطس (ڈائیبیٹیز) کی جانچ لازمی طور پر کرائی جائے، تاکہ متعلقہ بیماریوں کی بروقت شناخت ہو سکے اور مناسب علاج فراہم کیا جا سکے۔ڈی سی نے محکمہ تپ دق میں خالی اسامیوں کو جلد پر کرنے کی ضرورت پر بھی زور دیا، تاکہ پروگراموں کے نفاذ میں کوئی رکاوٹ نہ آئے۔ ساتھ ہی ضلع تپ دق مرکز، چترا میں پورٹیبل ایکس رے مشین کی سہولت جلد شروع کرنے کی ہدایت دی گئی، جس سے دور دراز علاقوں میں بھی مریضوں کی اسکریننگ اور جانچ میں تیزی لائی جا سکے۔ اجلاس میں ‘ٹی بی سے پاک پنچایت مہم‘کو بھی تیز کرنے پر تبادلہ خیال کیا گیا۔ ڈپٹی کمشنر نے کہا کہ ضلع کی زیادہ سے زیادہ پنچایتوں کو ٹی بی سے پاک بنانے کی سمت میں ٹھوس کوششیں کی جائیں۔ اطلاع دی گئی کہ سال 2025 کے لیے ضلع کی چھ پنچایتوں کا انتخاب ‘ٹی بی فری پنچایت‘ کے طور پر کیا گیا ہے، جہاں خصوصی مہم چلا کر ٹی بی کے کیسز کو صفر کرنے کا ہدف رکھا گیا ہے۔ اجلاس میں سول سرجن ڈاکٹر جگدیش پرساد، ڈسٹرکٹ پروگرام مینیجر سنگیتا لوشی، ڈسٹرکٹ پروگرام کوآرڈینیٹر (ٹی بی) وکرانت کمار، ضلع پریشد ممبر نشا کماری، اوم پرکاش ورما، ٹی بی مریضوں کے نمائندے کنسلٹنٹ ابھیمنیو کمار، راجکمار سنگھ، ایڈووکیٹ نوین مشرا، انو شنکر گپتا، منوج کمار پانڈے، سنجے یادو، محمد سرفراز سمیت دیگر متعلقہ افسران اور نمائندے موجود تھے۔
