صحت خدمات اور بنیادی ڈھانچے کی ترقیاتی کاموں کا لیا جائزہ
جدید بھارت نیوز سروس
چترا،2؍جنوری: ضلع میں صحت خدمات کے معیار کو مسلسل یقینی بنانے کے مقصد سے آج ڈپٹی کمشنر کریتی شری جی نے صدر اسپتال، چترا کا اچانک معائنہ کیا۔ معائنہ کا بنیادی مقصد اسپتال میں دستیاب طبی سہولیات، جاری بنیادی ڈھانچے کی ترقیاتی کاموں اور مریضوں کو فراہم کی جا رہی خدمات کی اصل صورتِ حال کا جائزہ لینا تھا۔معائنہ کے دوران ڈی سی نے اسپتال احاطے کا دورہ کرتے ہوئے مختلف وارڈز، او پی ڈی، دوا تقسیم کمرہ اور دیگر یونٹس کا معائنہ کیا۔ اس دوران ڈاکٹروں اور صحت عملے کی حاضری، مریضوں کی تعداد، علاج کی سہولیات اور صفائی کی صورتحال کا بھی جائزہ لیا گیا۔معائنہ کے بعد ڈی سی نے موجود میڈیا سے گفتگو کرتے ہوئے بتایا کہ صدر اسپتال چترا میں ہو رہے انفراسٹرکچرل ڈیولپمنٹ کے کاموں کی باقاعدہ نگرانی کی جا رہی ہے تاکہ صحت سہولیات کو مزید بہتر بنایا جا سکے۔ انہوں نے کہا کہ اسپتال میں مریضوں کو فراہم کی جا رہی خدمات کے معیار کا اندازہ لگانا بھی اس معائنہ کا ایک اہم مقصد ہے۔اس موقع پر ڈپٹی کمشنر نے جانکاری دی کہ صدر اسپتال چترا میں ماں اور نومولود بچوں کی دیکھ بھال کے شعبے کا جلد آغاز کیا جائے گا۔ اس کے شروع ہونے سے زچگی اور نومولود بچوں کی صحت خدمات کو تقویت ملے گی اور سنگین معاملات میں مریضوں کو مقامی سطح پر ہی بہتر سہولیات دستیاب ہو سکیں گی۔اچانک معائنہ کے ذریعے انتظامیہ نے صحت خدمات کی صورتحال کا معروضی جائزہ لیا، تاکہ مستقبل میں اسپتال میں دستیاب سہولیات کو مزید مضبوط اور مؤثر بنایا جا سکے۔اس موقع پر ڈپٹی ڈی سی امرندر کمار سنہا، سول سرجن ڈاکٹر جگدیش پرساد، صدر اسپتال کے سپرنٹنڈنٹ ڈاکٹر پنکج کمار سمیت دیگر متعلقہ افسران اور ملازمین موجود تھے۔
