کستوربا گاندھی گرلس ہائی اسکول کا معائنہ کیا، کئی ضروری ہدایات دیں
جدید بھارت نیوز سروس
چترا،22؍اگست: چترا ڈی سی کریتی شری جی نے شدید بارش کے درمیان گدھور بلاک میں واقع کستوربا گاندھی گرلز ہائی اسکول کا معائنہ کیا۔ اس دوران انہوں نے حالیہ بارشوں سے اسکول کے احاطے کو پہنچنے والے نقصانات اور کیمپس میں پانی جمع ہونے کی صورتحال کا تفصیلی جائزہ لیا۔ معائنہ کے دوران معلوم ہوا کہ قریب کے رام ساگر تالاب سے پانی داخل ہونے کی وجہ سے مشکلات کا سامنا ہے۔ اس پر ڈی سی نے وارڈن کو چوکس رہنے اور الرٹ موڈ میں رہ کر طالبات کی حفاظت کو یقینی بنانے کی ہدایت کی۔ انہوں نے کہا کہ طالبات کا تحفظ انتظامیہ کی اولین ترجیح ہے، کسی بھی قسم کی پریشانی کی صورت میں فوری طور پر ضلعی انتظامیہ سے رابطہ کیا جائے۔ڈی سی کریتی شری جی نے متعلقہ افسران کو بارش کے بعد اسکول کیمپس کے شمالی حصے کی باؤنڈری وال کو مزید مضبوط کرنے کی ہدایت دی۔ اس کے علاوہ پورے بلاک کے علاقے میں بارش سے ہونے والے نقصانات کا اندازہ لگا کر بی ڈی او کو تفصیلی رپورٹ فراہم کرنے کا حکم دیا گیا ہے۔گدھور سے معائنہ کرکے واپس آتے ہوئے ڈی سی نے چترا صدر بلاک میں واقع رام ٹنڈا پل کی حالت کا بھی جائزہ لیا اور کئی ضروری ہدایات دیں۔ انہوں نے تمام بی ڈی اوز اور سی اوز کو ہدایت کی کہ وہ اپنے اپنے علاقوں کا مسلسل معائنہ کریں، تاکہ شدید بارشوں کی وجہ سے عام لوگوں کو درپیش مسائل کو فوری طور پر حل کیا جا سکے اور ممکنہ نقصان کا صحیح اندازہ لگا کر فوری امداد کو یقینی بنایا جا سکے۔ ڈی سی کی ہدایات کے مطابق ضلع کے اعلیٰ افسران بھی مختلف علاقوں کا معائنہ کر رہے ہیں۔ ضلعی انتظامیہ اس بات کو یقینی بنا رہی ہے کہ بارش سے متاثرہ علاقوں میں لوگوں کو فوری مدد ملے اور انتظامیہ کسی بھی ہنگامی صورتحال میں فوری طور پر موجود ہے۔ آخر میں ضلعی انتظامیہ نے عوام الناس سے اپیل کی ہے کہ وہ شدید بارشوں کے دوران ندیوں، ڈیموں اور دیگر آبی ذرائع کے کناروں پر غیر ضروری طور پر نہ جائیں، چوکنا رہیں اور کسی بھی پریشانی کی صورت میں فوری طور پر مقامی انتظامیہ سے رابطہ کریں۔اس موقع پر اے سی اروند کمار، سی او انیل کمار، بی ڈی او ہری ناتھ مہتو اور انتظامیہ کے دیگر افسران اور اہلکار موجود تھے۔
