اکانکشا کوچنگ، JEE کامیاب امیدوار اور بورڈ امتحانات کے ٹاپر کو نقد انعامات و لیپ ٹاپ دیے جائیں گے
جدید بھارت نیوز سروس
رانچی، 31 اگست:۔ جھارکھنڈ میں اساتذہ کی تقرری امتحان میں کامیاب امیدواروں کو 2 ستمبر کو ریاست کے وزیر اعلیٰ ہیمنت سورین تقرری نامے (Appointment Letters) تفویض کریں گے۔ اسی تقریب میں دسویں اور بارہویں جماعت کے بورڈ امتحانات میں اول آنے والے طلبہ کو بھی اعزاز سے نوازا جائے گا۔
اکانکشا کوچنگ کے کامیاب طلبہ کو بھی اعزاز
اس موقع پر جھارکھنڈ حکومت کی زیرِ نگرانی چلنے والی ’اکانکشا کوچنگ‘ کے اُن طلبہ کو بھی انعام دیا جائے گا جنہوں نے JEE Mains اور JEE Advanced امتحانات میں کامیابی حاصل کی ہے۔ علاوہ ازیں، ’سی ایم اسکول آف ایکسیلنس‘ کے دسویں اور بارہویں جماعت کے ان طلبہ کو بھی اعزاز دیا جائے گا جنہوں نے ریاستی سطح پر اول، دوم یا سوم پوزیشن حاصل کی ہو۔
پروجیکٹ بھون آڈیٹوریم میں منعقد ہوگا تقریب
تقرری نامہ تقسیم اور اعزاز تقریب 2 ستمبر کو رانچی میں واقع پروجیکٹ بھون آڈیٹوریم میں منعقد ہوگی۔ اس سلسلے میں تمام اضلاع کو باقاعدہ خط ارسال کر دیا گیا ہے۔ خط میں واضح کیا گیا ہے کہ ریاستی سطح پر اول پوزیشن حاصل کرنے والے طلبہ کو رانچی میں منعقدہ مرکزی پروگرام میں اعزاز دیا جائے گا، جبکہ دوم اور سوم پوزیشن حاصل کرنے والے طلبہ کو متعلقہ ضلع کی سطح پر اعزازات دیے جائیں گے۔
نمایاں طلبہ کو مالی انعامات اور لیپ ٹاپ
ریاستی سطح پر اول پوزیشن حاصل کرنے والے طالب علم کو 3 لاکھ روپے، دوم پوزیشن والے کو 2 لاکھ روپے اور سوم پوزیشن والے طالب علم کو 1 لاکھ روپے کا انعام دیا جائے گا۔ ان تمام نمایاں طلبہ کو لیپ ٹاپ بھی دیے جائیں گے۔ اکانکشا کوچنگ سے کامیاب ہونے والے طلبہ کو بھی لیپ ٹاپ دیا جائے گا۔
25 طلبہ کا قومی اداروں میں داخلہ
قابل ذکر ہے کہ اس سال اکانکشا کوچنگ سے 25 طلبہ کا داخلہ ملک کے مختلف ممتاز انجینئرنگ اداروں میں ہوا ہے، جن میں سے 6 طلبہ نے آئی آئی ٹی (IIT)، 10 نے این آئی ٹی (NIT) اور باقی طلبہ نے دیگر معروف انجینئرنگ کالجوں میں داخلہ حاصل کیا ہے۔
