کہا: ہماری حکومت شہداء کے بچوں کے روشن مستقبل کی ضامن ہے
جدید بھارت نیوز سروس
رانچی، 8 اکتوبر:۔ وزیر اعلیٰ ہیمنت سورین سے شہید کانسٹیبل سنیل کمار رام اور سنتن کمار مہتا کے اہل خانہ نے آج رانچی میں واقع وزیر اعلیٰ رہائش گاہ پر ملاقات کی۔ اس موقع پر وزیر اعلیٰ نے دونوں خاندانوں کو اسٹیٹ بینک آف انڈیا پولیس سیلری پیکیج کے تحت 1.10 کروڑ روپے فی کس مالی امداد کے چیک فراہم کیے، جو ان کے بینک کھاتوں میں جمع کر دیے گئے۔وزیر اعلیٰ نے شہداء کے اہل خانہ سے ہمدردی کا اظہار کرتے ہوئے کہا کہ جھارکھنڈ ریاست اپنے شہداء کی قربانیوں کو ہمیشہ یاد رکھے گی۔ انہوں نے کہا کہ حکومت ان خاندانوں کے ساتھ ہر قدم پر کھڑی ہے اور شہداء کی قربانیوں کو سلام پیش کرتی ہے۔وزیر اعلیٰ نے اعلان کیا کہ حکومت رانچی میں ایک رہائشی اسکول تعمیر کرے گی، جہاں شہید اہلکاروں کے بچوں کو مفت اور معیاری تعلیم فراہم کی جائے گی۔ اسکول کی تعمیر کے لیے جھارکھنڈ جگوار میں چار ایکڑ زمین کی نشاندہی کی گئی ہے۔ ساتھ ہی پولیس اہلکاروں کے لیے ایک اسپتال بنانے پر بھی غور کیا جا رہا ہے۔وزیر اعلیٰ نے موجود افسران کو ہدایت دی کہ شہید خاندانوں کو پنشن، نوکری، اور دیگر تمام مراعات بروقت فراہم کی جائیں۔ افسران نے بتایا کہ دونوں شہیدوں کی بیویاں گریجویٹ ہیں، جنہیں محکمہ پولیس میں کلرک کی نوکری دی جائے گی۔مزید یہ کہ حکومت کی جانب سے دونوں خاندانوں کو مجموعی طور پر تقریباً 2 کروڑ روپے کی امداد دی جائے گی، جس میں دیگر مراعات شامل ہوں گی۔اس موقع پر وزیر خزانہ رادھا کرشن کشور، ڈی جی پی انوراگ گپتا، ایس پی رشما رمیشن، اور اسٹیٹ بینک آف انڈیا کے اعلیٰ افسران بھی موجود تھے۔
