جدید بھارت نیوز سروس
رام گڑھ،13؍دسمبر: ضلع میں ہفتہ کے روز ایک بھیانک سڑک حادثہ پیش آیا۔ یہاں چوٹوپالو گھاٹی میں بریک فیل ہونے کے باعث ایک ٹریلر بے قابو ہو گیا اور اس نے اپنے آگے چل رہی ایک موٹر سائیکل سمیت پانچ گاڑیوں کو ٹکر مار دی۔ اس حادثے میں کئی گاڑیاں بری طرح تباہ ہو گئیں اور ان میں سوار ایک درجن سے زائد افراد زخمی ہو گئے۔ تمام زخمیوں کو مقامی صدر اسپتال اور نجی نرسنگ ہومز میں داخل کرایا گیا ہے۔اطلاعات کے مطابق سریا سے لدا ہوا ٹریلر رانچی سے رام گڑھ کی طرف آ رہا تھا۔ اسی دوران گھاٹی میں اچانک اس کے بریک فیل ہو گئے، جس کے بعد وہ بے قابو ہو کر آگے چلنے والی گاڑیوں سے ٹکرا گیا۔ جن گاڑیوں کو ٹکر لگی ان میں انووا، بولیرو، ہنڈئی آئی 10، فورچونر اور ایک موٹر سائیکل شامل ہیں۔ اس حادثے میں گاڑیوں میں سوار کئی افراد شدید زخمی ہو گئے۔رام گڑھ کے ڈپٹی کمشنر فیض اک احمد ممتاز کی ہدایت پر سب ڈویژنل آفیسر و ضلع ٹرانسپورٹ آفیسر انوراگ کمار تیواری اور ضلع انتظامیہ کی ٹیم فوری طور پر موقع واردات پر پہنچی اور زخمیوں کو ابتدائی طبی امداد فراہم کی۔ اس کے بعد سبھی کو صدر اسپتال منتقل کیا گیا جہاں ان کا علاج جاری ہے، جبکہ شدید زخمیوں کو بہتر علاج کے لیے ریفر کر دیا گیا ہے۔رام گڑھ پولیس نے گھاٹی کی ایک لین بند کر کے دوسری لین سے گاڑیوں کی آمد و رفت جاری رکھی۔ حادثے کے بعد کچھ دیر کے لیے گھاٹی میں ٹریفک جام ہو گیا تھا، تاہم اب آمد و رفت معمول پر آ چکی ہے۔ انتظامیہ نے حادثے کا شکار تمام گاڑیوں کو سڑک سے ہٹوا دیا ہے۔اسپتال انتظامیہ کو پہلے ہی اطلاع دے دی گئی تھی۔ ساتھ ہی ڈی سی نے انچارج آفیسر، خفیہ شاخ، رویندر کمار گپتا کو صدر اسپتال پہنچ کر اپنی نگرانی میں زخمیوں کے علاج کو یقینی بنانے کی ہدایت دی تھی تاکہ انہیں فوری طبی سہولت فراہم کی جا سکے۔
سی پی آر اور فرسٹ ایڈ کا علم ضروری: ڈی سی
ڈپٹی کمشنر فیض اک احمد ممتاز نے واقعے پر افسوس کا اظہار کرتے ہوئے زخمیوں کے مناسب علاج کی ہدایت دی ہے۔ انہوں نے کہا کہ سڑک حادثات کی صورت میں سی پی آر اور فرسٹ ایڈ کا علم انتہائی ضروری ہے، کیونکہ بروقت دی گئی ابتدائی طبی امداد کئی بار جان بچا سکتی ہے۔ انتظامیہ نے عام شہریوں سے اپیل کی ہے کہ وہ ٹریفک قوانین پر عمل کریں اور ہنگامی حالات میں ابتدائی طبی امداد دینے کے لیے خود کو تربیت یافتہ بنائیں۔
ٹریلر کا بریک فیل؛پانچ گاڑیوں کو ماری ٹکر،درجنوں افراد زخمی
